Atassut: Inatsit aalisartunut iluaqusiissaaq

Aalisarnermut inatsimmik allannguineq aalisartunut iluaqusiisussaasoq Atassut isumaqarpoq.
apriilip 14-at 2011 12:25

Piginnittussaanerup, pisassiissutinik qaffasinnerpaaffiliinerit aningaasaqarniarnikkullu suliniutissat aalisarnermut inuussitissarsiuteqarnermut inuiaqatigiinnullumi ataatsimut isigalugu iluanaarutaasussaasut Atassummit oqaatigineqarpoq.

- Aalisarnermik inuussutissarsiuteqartut illersorneqarnissaat pillugu inatsisitigut qularnaatsumik toqqammavissaqartitsisoqassanersoq Atassummit suli eqqarsarnartoqartitsigaluarluta, siunnersuutip siullermeerneqarnerani neriorsorneqarpugut aappassaaneerinninnginnermi apeqqut pillugu sukumiisumik qulaajaasoqassasoq, tusagassiuutitigut nalunaarummi oqaatigineqarpoq.

- Naak massa sinerissamut qanittumi aalisarnermi pisassiissutit qaffasinnerpaaffissaannik killiliineq 15 procentimut qaffanneqarnissaanut tunngatillugu ilumut sinerissamut qanittumi aalisarnerup ineriartortinneqarnissaanut ajunngitsumik iluaqusiissanersoq Atassummit eqqarsarnartoqartitsigaluarluta, siunnersuutip siullermeerneqarnerani neriorsorneqarpugut aappassaaneerineq sioqqullugu soqutigisaqartut tamarmik tusaaniarneqassasut.

Aalisarneq siunissami imatut aaqqissugaasariaqartoq ullumikkut aalisarneqartut kisiisa isumalluutiginagit, pisuussutilli ullumikkut atorluarneqanngitsut ullumikkumiit annertunerusumik inerisaavigineqarnissaat pillugu Naalakkersuisut naqissusiinerat aammattaaq Atassummiit iluarisimaarneqarpoq.

Tamanna pitsaasumik kinguneqaannarsinnaasoq Atassummiit nalunaarutigineqarpoq naggataatigullu Siumumut kaammattuutigalugu tikkuinnaratik inatsisiliornermut sunniinissaminnut oqaatigineqartutuulli peqataaqqullugit.