ATASSUT: Imminnut iluaqutissarsisut tunuarlik!

Attartortumiit piginnittumut aaqqissuussinermik innarliisut akisussaatinneqartariaqarput, inuit pineqartut sakkortunerpaamik kaammattussavagut qinikkatut sulinerminnit tunuaqqullugit, taama ATASSUT sinnerlugu Inatsisartuni Naalakkersuisunilu ilaasortaatitat tusagassiutinut allapput.
apriilip 25-at 2008 07:28

ATASSUT-ip siulittaasua Finn Karlsen ima tunngavilersuivoq:

- Ippassaq atorfilittamik nassuiaatitsiartorluta gruppemut aggertitsivugut. Una pisoq annertoorujussuarmik inuiaqatigiit akornanni oqallisaavoq assullu nuanniitsorujussuulluni, sulisinneqartut utaqqiinnarsinnaanngilagut kinguarsaatigiinnarneqarsinnaanngillallu, Finn Karlsen oqarpoq.

Taanna aperaarput tunuaqqusatik tunuarumanngiinnarpata qanoq taava iliussanersut.

- Uagut pinngitsaalisinnaanngilagut kaammattuinnarpagut, eqqartuussisuunngilagut kaammattuiinnarsinnaavugut, akivoq.

Nangilluta aperaarput Finn Karlsen nammineq naalakkersuisuni ilaasortaammat taava naalakkersuisooqatigiinneq unitsinneqassanersoq.

- Taakkununnga tunngatillugu isumaqarpunga naalakkersuisooqatigiinneq innarlerneqarsinnaanngitsoq, suliat aamma qangali aallartereerput naalakkersuisooqatigiinnerput sioqqullugu, oqarpoq.

Taanna qalleqqissaavoq politikkerit kisimik pineqanngitsut aammali atorfilittat pineqarmata naatsorsuutiginngikkini tamatuma naalakkersuinermik kinguneqarsinnaaneranik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq