Atassut-ikkut Demokrat-illu nittartakkatigut "sorsuupput"
Atassutip Demokraatillu akornanni oqaatsit pillugit sorsuuttoqalernera aallartissimasoq oqaatigineqarsinnaavoq.
Atassutip nittartakkatigut oqallittarfia Demokraatit siulittaasuanit uparuartorneqarpoq, ilaatigut inuttut malersugaasutut misigisimagami.
Inatsisartut ataatsimiilerpata tamanna pillugu Demokraatit naalakkersuisunut apeqquteqaateqassamaarput.
Hans Enoksenimut apeqqutigineqartussaq tassaavoq, ammip qalipaataanik nittartakkami immikkoortitsinerit nikanarsaanerillu qanoq ililluni pinaveersaartinneqarsinnaanersut.
Apeqquteqaammi Atassutip nittartagaani saqqummiunneqarsimasut assersuutigineqassamaarput.
Taamatullu apeqquteqaateqarneq Atassutip qisuariaateqarfigaa. Atassut isumaqarpoq, kiffaanngissuseqarluni oqaaseqarsinnaanermik Demokraatit killilersuiniarsarisut.
Oqaatsit pillugit sorsuutilerneq suli naammassinavianngikkallarpoq, Demokraatimmi kissaatigaat apeqquteqaatertik ullut qulit qaangiutsinnagit akineqassasoq.
