Atassut: AUL namminersortunngorsarunnaarniarsiuk

Kalaallit Nunaat ilaasartaammik sinersortaateqarani saperpoq. Taamaattumik Arctic Umiaq Linep umiarsuaatileqatigiiffittut matoqqajaanera annaanniarlugu Naalakkersuisunit Aningaasaqarnermut Ataatsimiititaliaq ilassutitut aningaasaliissuteqarnissaanik qinnuigineqassalluni, Atassut isumaqarpoq.
Allattoq mlk
marsip 18-at 2010 14:52

Atassutip siulittaasua Gerthardt Petersen aamma partiip gruppeformandia Finn Karlsen isumaqarput Arctic Umiaq Line ikiorsertariaqartoq.

Air Greenlandip timmisartuutileqatigiiffiup aktiaatit 50 procentiusut tuniniarniarlugit nalunaarutigereeraalu Arctic Umiaq Line matuneqarnissaminut ulorianartorsiulerpoq. Air Greenlandip aktiaatiminik tunisinissani ilumoorutissappagu, Arctic Umiaq Linep pisortaata Jette Larsenip umiarsuaatileqatigiit matuinnartariaqalernissaat annilaanngatigaa.

Royal Arctic Line aktiaatit affaasa appaannik pigisaqarpoq. Ilassutitut aningaasaliissuteqartoqarnissaanik qinnuteqarnissap saniatigut Atassutip Naalakkersuisut Air Greenlandip aktiaataanik piseqqullugit ingerlatsinerullu Royal Arctic Linemut nuunneqarnissaanik kaammattorpai.

Atassutip oqarnera naapertorlugu Arctic Umiaq Linep ajornartorsiornera umiarsuaatileqatigiit namminersortunngorsarneranni - taamatullu Air Greenlandip Royal Arctic Linellu ingerlatseqatigiiffimmik annaasseriaraluarneranni kukkussuteqartoqarsimanera pissutaavoq.

Naalakkersuisunit Arctic Umiaq Linemi pissutsit sap. akunnerani tullermi ataatsimiinnermi oqaluuserineqassapput. Umiarsuaatileqatigiit namminneq siulersuisuisa ingerlatseqatigiiffiup siunissaa siulersuisut apriilip aqqaneq-aapaanni ataatsimiinnissaanni isummerfigineqassaaq.