Atassut AUL-ip tunineqarnissaanut akerliuvoq

Naalakkersuisut Arctic Umiaq Linemik tunisiniarnerat

akuersaarneqarsinnaanngilaq. Aningaasatigut nunaqavissunik angallassinikkut akileraarutitigullu isertitatigut tunisineq annaasaqaataassaaq. Taama Atassut Inatsisartut aningaasaqarnermut Ataatsimiititaliaanni ikinnerussuteqarluni tunisiniarnermut akerliliivoq. Atassut sinnerlugu ataatsimiititaliami ilaasortap Augusta Salling-ip Atassutip akerliunera ima tunngavilersorpaa:

-Tunngavilersuutigaarput allanit pitsaanerusumik neqeroortoqarsinnaanera qularnaaqqaarnagu tuniniaanerup ingerlanneqarnera akuersaarneqarsinnaanngitsoq.

Atassummit aamma tunngvilersuutigineqarpoq Arctic Umiaq Linep pigisaasa tunisinermut ilaatinneqartut nalingat eqqarsaatigissagaanni 65 million koruunit annikippallaartut.

- Umiarsuit marluk, umiarsuaq takornariartaat ataaseq, ikaartaatit arlallit, allaffissuit, sulisut inissiaat arfinillit, biilit sisamat allaffinni atortut ilaalu ilanngullugit. Taakku taamaasa 65 millioniinnalerlugit massakkut tunineqarput. Isumaqarpugut taakku nalingat annertunerujussuusoq. Unammilleqatigiinneq tunngavigalugu tuniniaasoqarsimagaluarpat pitsaanerusumik angusaqarsimasinnaagaluarneq ilimagaarput, Augusta Salling oqarpoq.

Atassutip tunngavilersuutimi naleqassusiat naatsorsimanerpaa? Augusta Salling ima akivoq:

- Tuniniaasoqarsimagaluarpat immaqa pitsaanerusumik neqerooruteqartoqarsinnaaneq tunngavigalugu aki pitsaanerujussuaq anguneqarsinnaasimagaluarpoq. Sumiluunniit unammilleqatigiinneq tunngavigalugu tuniniaasarnerni aki pitsaanerusoq pissarsiarineqartarpoq.

Pigisat tuniniarneqartut annertussusaat isigissagaanni kiisalu illuutinik allaffissuarnillu Nuummi tuniniaasarnermi massakkut akiusut naatsorsuutigissagaanni 65 million koruunit akikinaarinerusut Augusta Salling isumaqarpoq.

- Ajoraluaqaaq, tassami unammilleqatigiinneq tunngavigalugu neqerooruteqarsimasuuppat aki pitsaanerusoq anguneqarsimasinnaagaluarmat. Aamma angallassinikkut pitsaanerusumik aaqqiisoqarsimasinnaagaluarpoq, ullumikkut nunaqarfiit illoqarfiillu arlallit tikinneqarsinnaajunnaaritik pisisut nalunaaruteqarput, unammilleqatigiittoqarsimagaluarpat uku pisisuusut ullumikkut neqeroorutigisaminnit pitsaanerusumik neqerooruteqarsimasinnaagaluarput.

Atassutip aamma tikkuarpaa Arctic Umiaq Line tunineqarpat akileraarutitigut isertitassaagaluit ukiuni pingasuni katillugit 15 million koruunit annaaneqassasut, umiarsuarni inuttaasut akileertannginnissaat isumaqatigiissutaammat. Atassummit aamma erseqqissaatigineqarpoq umiarsuaatileqatigiiffimmik pisisut ukiuni qulini 65 million koruuninik naafferaasussat akiliisinnaajunnaassagaluarpata tamanna annaasaqaataassasoq, taamaattoqasagaluarpammi umiarsuit qularnaveeqqutigineqartut qanoq isikkoqarnissaat qularnaarneqarsimanngimmat.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat