Atassut: Ataatsimiititaliami inissaqaqqulluta tunngaviusumik inatsit allanngortariaqarpoq

Ataavartumik ataatsimiititaliani ilaasortaanissaq danskit tunngaviusumik inatsisaannut naapertuutissanngippat danskit tunngaviusumik inatsisaat allanngortariaqartoq Atassut isumaqarpoq.

Folketingip nunanut allanut tunngasunik ataatsimiittartoqatigiivini, Illersornissaq pillugu ataatsimiititaliami, Inatsiseqarneq pillugu ataatsimiititaliami taamatullu Kalaallit Nunaannut tunngassuteqartunut ataatsimiitaliami ilaasortaaffiit, Kalaallit Nunaannit qiningaasunit pinngitsoorani ilaasortaaffigineqartarnissaat Atassummit piumasarineqarpoq.

Danskit tunngaviusumik inatsisaannut naapertuutinngitsoq

Tamannali piumasarineqartoq, danskit tunngaviusumik inatsisaannut naapertuutinngitsoq, Ingerlatsinissamut pisinnaatitaaffeqarneq pillugu ilisimatooq, Jørgen Albæk Jensen oqarpoq.

- Ataatsimiititaliani ilaasortaassagaanni partiit ataasiakkaat folketingimut qiningaasortaasa amerlassusaat naapertorlugit toqqarneqartartussaasut tunngaviusumik inatsimmi allassimavoq. Taamaattumik kalaallit marluinnaat qiningaajuartartillugit tamanna piumasarineqaannarsinnaanngilaq.

Jørgen Albæk Jensen oqarpoq erseqqissarlugulu, Savalimmiuniit Kalaallit Nunaanniillu, tamarmik immikkut marluinnarnik folketingimi inissanik pissarsisarmata, ataatsimiititaliani ilaasortaaffinnik ataavartunik tunineqarsinnaanngitsut.

Inatsit allanngortinneqartariaqartoq Steen Lynge isumaqarpoq

Taamaassappat tunngaviusumik inatsit allanngortinneqartariaqartoq, Atassut sinnerlugu folketingimut qiningassanngortittoq, Steen Lynge oqarpoq.

- Tunngaviusumik inatsisip allanngortinneqarnissaanik, Folketingimi partit amerlasuut kissaateqartarput. Taamaattumik uagut Kalaallit Nunaanneersugut aamma allanngortitsisoqarnissaanik kissaateqarutta saqqummiussisinnaatitaavugut. Atassummiillu pingaartipparput danskit assigalugit naligiissumik pineqarnissarput, Steen Lynge oqarpoq.

Ataatsimiittartoqatigiinni ataatsimiititalianilu ataavartumik kalaallit ilaasortaatitaqarnissamik kissaateqarneranni, tunngaviusumik inatsisip allanngortinneqarnissaa aporfigineqaraluartoq taamaattoq tamassuma allanngortinneqarnissaa piviusorsiortuusoq, Steen Lynge isumaqarpoq.

- Taasiunngikkutami siunnersuummillu kingusinaarluta apuusigutta, tunngaviusumik inatsit imaasiallaannaq allanngortinneqarsinnaassanngilaq. Taamaalinngikkutami taava asulersuaq suliaqarsimassaagut. Atassummit pingaartipparput, siunissami iluaqutaasinnaasoq angussagutsigu taava maanngagaaq siunnersuummik apuussaqarnissarput.

Atassut sinnerlugu Folketingimut qineqqusaartoq, Steen Lynge taama oqarpoq.

Oqaaseqartinneqarsinnaasut

Kalaallit Savalimmiormiullu ataatsimiititaliani ilaasortaaffigisinnaanngisaminni alaatsinaatsutut ilaasortaasinnaaneri periarfissaasinnaavoq, tamannali pissappat Folketingip suleriaasianik allanngortitsisoqassaaq. Alaatsinaatsutulli ilaasortaanermi taasinernut peqataasinnaassanngillat taamaattorli oqaaseqartinneqarsinnaassallutik.

Ataatsimiititalianili assigiinngitsuni ilaasortaasinnaaneq ullumikkut periarfissaavoq, tassa Kalaallit Savalimmiormiullu politikkikkut isumaqatigiinniarnerni tamanna angusinnaallugu.