Atassut ataatsimeersualerpoq

Atassutip siulitaasua Finn Karlsen aperaarput siulittaasussatut qinigassanngorteqqissanersoq.

- Taamaaliorniarpunga, akivoq.

Finn Karlsen isumaqarpoq ukiuni kingullerni Atassut nukittornerusimaqisoq.

- Atassut massakkut nukittoorujussuarmik ingerlavoq, inuusuttuaraallutali tusartualerparput Atassut nungussasoq, allaat qinersinerup ulluani ullup qeqqaanerani radioaviisimi allaat oqaatigineqartarpoq partii taamaallaat ima ikitsigisunik isertitaqassasoq tamatigut uniorluinnaqqissaartarpaat, oqarpoq.

Finn Karlsenip unammillertissani Søren Alaufesen immaqalu Emilie Olsen unammillerluarsinnaanerarpai.

- Søren Alaufesen 2005-imi aamma qineqqusaarpoq aamma innersuussutigineqartup aappaa aamma qineqqusaaraluarput tassa taakku marluullutik unammillerlutik siornatigut misilereerpaat, oqarpoq.

Finn Karlsenip siulittaasutut qinigaaqqissagaluaruni nutaatut siunertarinerarpaa aatsitassarsiornermut tunngasut nutaamik eqqarsarluni periuseqarfigineqarnissaat. Taamatuttaaq namminersulernissap oqaluuserilluarnissaa pingaartutut salliutikkusuppaa.

Atassutip ataatsimeersuarnera arfininngorpat nalliuttorsiornermik naggaserneqassaaq, Atassut ukioq manna ukiuni 30-inngortorsiorluni nalliuttorsiussammat.

Atassutip ataatsimeersuarnera Nuummi katersortarfimmi ingerlanneqassaaq.