Atassut: Aslak Inatsisartuni ilaasortaanini eqqarsaatigisariaqarpaa
Atassutip siulittaasuata Aqqalu Jerimiassenip Aslak Jensen kaammattorpaa inatsisartunini ilaasortaanini eqqarsaatigisariaqaraa, eqqartuussanissaatali tungaanut inatsisartuni sulilluni saqqumilaaginnassanersoq isummerfiginiarnagu.
Atassutip siulitaasua Aqqalu Jerimiassen inatsisartuni qinersinermi kingullermi Siumumiit sassartuni taaguunneqarnerpaat ilaat Asalak Jensen isumaginninnermi sulisumut politiinullu toqutsinissamik siorasaarisimasutut unnerluutigineqarmat taama oqarpoq.
AAMMA ATUARUK Inatsisartunut ilaasortaq toqutsinissamik siorasaarisimasutut unnerluutigineqartoq: Pinngitsuunerarpoq
Inatsisartunut qinersinermi Siumut sinnerlugu qinigassanngortittuni taaguunneqarnerpaat pingajuat Aslak Jensen toqutsinissamik siorasaarisimasutut eqartuussisoqarfik Sermersuumi sassartinneqasssaq.
Tamanna unnerluussisummi suliami allagaatinik takunnissinnaatitaaneq atorlugu KNR-ip pissarsiarisimaasaani allaqqavoq.
Aslak Jensen KNR-imut oqarpoq unnerluussutigineqartunut pisuunani.
Atassutip siulitaasuata erseqqissaatigaa,inatsisartunut ilaasortaq suli eqqartuunneqanngimmat.
- Suli eqqartuussaanngikkuni, suli ajortuliaqanngitsutut naatsorsuussaavoq.
partiip siulitaasua taama oqarpoq.
Nutaarsiassaq saqqummiunneqartoq Aqqalu Jerimiassenimut nuanninngilaq
- Nuanninngilaq soorumalimi taama pisoqarnera, kisiannili allatut ajornaqaaq, taamanna tusarlerneqartussaasimagatta taama tusarlerneqarpugut, suliallu naammassinissaa utaqqiinnartariaqarlugu, Aqqalu Jerimiassen taama oarpoq.
AAMMA ATUARUK Erik Jensenip Siumumi suliat inummut tunngasut ilungersunartut ajusaarutigigai
Aslak Jensenip parteeqataa Qarsoq Høegh Dam, upernaaq Inatsisartunut qingaasoq, Inatsisartut siullermeerlutik katersuunneranni nammineerluni tunuarpoq, i Inatsisartuni amerlanerussuteqartut Inatsisartuni ilaasortanngortussatut piukkunnanngitsutut nalilerumaaraanni ilimagigamiuk
Qarsoq Høegh-Dam Nunatta Eqqartuussisuuneqarfiani 2019-imi ikiaroornartoq pillugu eqqartuussaavoq.
AAMMA ATUARUK Qarsoq Høegh-Dam: Ikiaroornartumut tunngasoq parteeqatinnut oqaluttuarinikuunngilara
Aqqalu Jerimiassenip politikkereqatini kaammattorpai akisussaaqataanertik eqqarsaatigeqqullugu.
- Inuttut nalunngissuseqarpugut, ajortuliaqarutta imaluunniit eqqartuussivimmi arlaannik suliaqartoqarpat ilimanaateqarlunilu pisuutitaasinnaaneq, inuttut nalunnginnissuseq tassani pigisariaqarpoq aperalunilu, - ilumut ingerlaqqissinnaavungaa ? immaqa aamma taanna inuttut ataasiakkaatut akisussaaffeqaqataaneq eqqarsaatigineqarsinnaavoq tassani,taama oqarpoq Aqqalu Jerimiassen Inatsisartuni ilaasortaq aamma Atassummi siulittasoq.
Aslak Jensenip eqqartuussaanissaa suli ullulerneqanngitsoq, Kalaallit Nunaanni Politiit KNR-imut taama ilisimatitsipput.
Inatsisartunut ilaasortaq unnerluussisussaatitaasumut sassartinneqarsinnaanersoq Inatsisartut akuereqqaartussaavaat.
Aviisip Sermitsiaq.AG-ip allaaserisaa naapertorlugu Danmarkimi inatsisilerinermik ministereqarfiup Inatsisartunut ilaasortap eqqartuussivimmut sassartinneqarsinnaaneranik Inatsisartut siulittaasoqarfia qinnuigisimavaa.
Inatsisilerinermut ministereqarfiup noqqaassutaa, inatsisartut ukiuakkut ataatsimiinerisa ulluisa siullianni alajangiiffigineqarnissaa naatsorsuutigineqarpoq.
Inatsisartut ukiuakkut ataatsimiinerat septemberip ulluisa 24-anni allartissaaq.
