Atassut aningaasakilliorpoq

- Aallaqqaataaniilli isumaqatigiissimavugut pingaarnertut qineqqusaartitarput Steen Lynge sapinngisamik qineqqusaarnerni amerlasuuni peqataassasoq. Kisianni tassa qineqqusaartitatta tamakkerlutik angalatinnissaannut akissaqarsimanngilagut, Atassutip aaqqissuussaanikkut siulittaasuat tullia folketingimullu qineqqusaartoq Hans Lyberth KNRimut taama oqarpoq.

Atassutip peqataaffigereerpai Ilulissani Sisimiunilu qineqqusaarnerit taakkunanilu Steen Lynge aamma Hans Lyberth oqalliseqataasarput. Taamatuttaaq pivoq ippassaq unnukkut KNRimi Atassutip qineqqusaarutai sammineqarmata.

- Maanna kujataani qineqqusaarnerni Knud Kristiansen peqataasussanngorpoq aammalu qineqqusaarnerup nalaani Nuummiissalluni. Arnannguaq Blytmann maanna Aasiaanniittoq Qeqertarsuup tunuani angalanissamut periarfissanik ujartuisimagaluarpoq aningaasartuutissalli tassani qaffasippallaarsimaapput, Hans Lyberth oqarpoq.

Atassutip qineqqusaartitai tassapput: Steen Lynge, Hans Lyberth, Knud Kristiansen aamma Arnannguaq Blytmann.