Atassut angallannermik aqqissuussinermut isorinnippoq

Atassutikkut Naalakkersuisooqatitik Siumukkut sakkortuumik isornartorsiuteqarfigaat.

Atassutikkut Imatsisartut ukiaru ataatsimiilerpata

Nunatsinni angallannikkut atugassarititaasut ajorseriaateqarsimanerat aaqqiivineqaqqullugu imaatigut ilaasunik angallassiveqatigiit isumaqatigiin-niarfigineqarnissaat pillugu Naalakkersuisut sulissuteqaqqullugit aalajangiiffissaattut siunnersuuteqarniarput. Inatsisartuni ilaasortap Atassummeersup Inatsisartullu Angallannermut Ataatsimiititaliaanni siulittaasup Godmand Rasmussenip, Naalakkersuisut aappaagu aningaasanut inatsisissami taamaallaat 10,9 million koruuninik angallassinermut tapiissuteqarniarnerat naammaginngilluinnarpaa:

-Pinngivinnermiit ajunnginnerupput naammanngillalli. Atukkagut pitsanngorsaavigissagutsigit inuiaqatigiit tamarmik atoorneqaataannut taakku naammangitsutut isigiuarpakka. Tassa Angallannermut Ataatsimiititaliami siulittaasutut akuersaarsinnaanngilakka, piumasaqaatinut tamakkiisumik iluarsiissutaasussaanngimmata. Mattusiinerinnartut oqatigiinnaraanni immaqa ajunnginneruvoq.

Atassut isumaqarpoq sinersortaaseeqqittoqartariaqartoq.

- Tamanna partiinit tamanit tapersersorneqarmat neriussimagaluarpunga Siumullu ataatsimeersuarmat erseqqissumik oqaatigineqarmat pimoorullugu sulissutiginiarneqassasoq- isumalluarfigileraluarsimavara.

Godmand Rasmussenip Angallannermut Naalakkersuisoq Kim Kielsen uparuarpaa.

- Pakatsissutigilaanngitsuunngilara Angallannermut Naalakkersuisoq tusagassiutitigut oqarmat, tamatuma iluani nammineq nassaariarsinnaanani- taama sanngiitsigisoqarsinnaanngilaq. Naalakkersuisup pisussaaffimmini inuiaqatigiit sakkortutigisumik eqqorneqartut takoreeramigit qanoq iliuuseqarnerusariaqarpoq.

Atassut Inatsisartut ukiaru ataatsimiilerpata angallanermik iluarsiinissamut aalajangiiffissatut siunnersuuteqarnermini aningaasat qanoq amerlatigisut atorneqarnissaat oqaatiginngilaat, tamannalu Godmand Rasmussenip ima nassuiaatissaqartippaa:

-Soorunami aningaasanik erseqqilluinnartunik oqanngilagut, suliassaq sunaluunnit suliakkiutigineqaraangat, atorfilittatigut ujaasinerit allartinneqartarmata.

Godmand Rasmussenip Inatsisartut Kukkunersiuisarnermut Ataatsimiititaliaanni siulittaasutut aningaasat angallannermut atorneqarsinnaagaluartut misissorsimavai.

-Aningaasanik arlalinnik atunngitsuugaqartoqareerpoq, soorlu sanaartornermi aningaasat atunngitsuukkat 18 million koruunit, nunaqarfinni suliffissaqartitsiniarnermut nuuttussanut 25 million koruunit taavalu pequtinut assartorneqartussaagaluanut 2,8 million koruunit atunngitsoorneqarsimapput.

- Arlaatigut ujaasinermi illikartitseqqinnermi atunngitsuukkani taakku nassaarineqarsinnaapput.

Arctic Umiaq Line 65 million koruunilerlugu siornaak 2005-imi tuniniarneqarnialermat Atassut sinnerlugu inatsisartut aningaasaqarnermut ataatsimiititaliaanni ilaasortaasut ikinnerussuteqarlutik akerliupput.