Atassut: Alcoa Aalajangiiffigineqarli

Akerlianillu Alcoa aluminiumik aatsitsiviliornissami sananissamut ingerlatsinissamullu akuersissummik tunineqarnissaanik Atassummit piumasarineqarpoq.

- Kalaallit Nunaat Alcoamik piginneqataassappat aningaasatigut maannamut misigimanngisaannakkatsitut atsigisumik nammatassaqartinneqalissaagut. Taamaaliornikkut sanngiillisinneqassaagut, ukiorpassuarni tulliuttuni pilersaarutit aningaasalersorsinnaajunnaassallugit. Taamaammat taanna aningaasalersorniaannarlugu nunanut allanut aningaasanik atorniartariaqassaagut, Augusta Salling Atassummi aningaasaqarnermut oqaaseqartartoq Aningaasaqarnermullu ataatsimiititaliami siulittaasoq oqarpoq.

Augusta Sallingip Alcoa-mik aningaasalersuinissaq pillugu aalajangiisoqarnissaa ujartoraa, Sermitsiaq.gl-imi allaaserinnittoqarpoq. Kalaallit nunaata innuttaasui aningaasaleeqataassanersut suli aalajangiunneqarsimannginnera Augusta Sallingip nuannarinngilaa.

-Taamaattumik aningaasaqarnermut inatsisissamut siunnersuummi iluarsiivigineqarnissaa piumasaraarput, Augusta Salling oqarpoq.