Atassut: Akit assigiissunngoqqittariaqarput

Atassut sinnerlugu Inatsisartuni ilaasortat marluk, Kristian Jeremiassen aamma Godmand Rasmussen isumaqarput innaallagissamut imermullu akit assigiikkunnaarsinneqarnerata kinguneri tunngavigalugit Naalakkersuisut nalilersueqqittariaqartut.

Akinik assigiikkunnaarsitsineq kikkulluunniit takusinnaavaat nanertuutinngortoq taamaattumillu Naalakkersuisut nalilersueqqissaaqqittariaqartut Godmand Rasmussen Qanoruumut ippassaq oqarpoq.

Inatsisartuni siunnersuutit attaveqarnermut pilersuinermut ineqarnermullu ataatsimiititaliami suliarineqartarput. Godmand Rasmussenip akit assigiikkunnaarneri kingunerilu ataatsimiitatiliami eqqartugassanngortinniarpai.

Akinik assigiikkunnaarsitsineq aallaqqaammut misiliinertut nalilerneqarsimammat ataavartussatut Naalakkersuisut aaqqiinerissanngikkaat, Godmand Rasmussenip neriuutiginerarpaa.

Inatsisartuni ilaasortaq Atassummeersoq alla, Kristian Jeremiassen isumaqarpoq, akinik assigiikkunnaarsitsinikkut nipaatsumik inuerussaasoqalersoq, tassa G-60 utersaartoq.

- Innuttaasut illoqarfinnut anginerusunut nutserarnerunissaannik suliaq iluatsikkiartortoq nuannaarutissaanngilaq, pitsaanerusumillu aaqqiisoqartariaqarpoq, Kristian Jeremiassen allappoq. Erseqqissaatigaa G 60 nipaatsumik utertoq, illoqarfinnilu nuuffiusussani suliluunniit piareersaasoqanngitsoq, meeqqerivitsigut atuarfitsigut inissatigullu.

- Akit qaaffakkiartuinnarput ingammik nunaqarfinni soorlu Akunnaami innuttasut aningaasaq tigummiaat annikilliartorpoq. Pisiniarfinnissaaq akit qaffakkaluttuinnarput ingammik ukioq naallugu umiarsuaqarfiusanngitsuni.

Kristian Jeremiassen tamanna pillugu isumaqarpoq assigiimmik akeqartitsineq uterfigineqaqqittariaqartoq.