Atassut: Aalisartut ikilingaartariaqanngillat

Augusta Sallingip nassuerutigaa, akilersinnaanerusumik aaqqissuussinissaq avaqqunneqarsinnaanngitsoq. Isumaqarporli, aalisartut ingerlariaqqinniarlutik allanik periarfissarsiorsinnaasariaqartut.

- Aalisartut qanoq ikilitiginissaat ikilissutaajumaartullu sumi suliffissarsiussanersut oqaluuserinngikkaluarlugu, nalilersueqqissaartariaqarpugut, pisariaqassappallu allanik periarfissiuussilluta, Augusta Salling oqarpoq. Alisarneq pillugu ataatsimiititaliarsuup nalunaarusiaani erserpoq, aalisartorpassuit 50.000 koruunit inorlugit ukiumut isertitaqartartut. Taamaammat malunnartumik allannguisoqartariaqassaaq.

- Aalisartut ilaat piffissap ilaannaani aalisartarput, taamaatumik isertitakittarlutik. Angallatilli anginerulaartut atorlugit pitsaanerusumik aalisartoqalerpat, aalisartut ingerlaannartussat isertitaginnerulissapput, inatsisartunut ilaasortaq oqarpoq.

Sinerissap qanittuani avataasiorlunilu aalisarnermut immikkoortitsineq atorunnaarneqassasoq siunnersuutigineqarpoq. Tulaassisussaatitaanerlu atorunnaasinneqassappat, illoqarfiit ilaanni nunaqarfippassuarnilu tunisassiorfiit arlallit matusariaqassapput.

- Taamaattumik allanngortitsinernik taama annertutigisunik pisoqassappat, suut tamaasa nalilesorluartariaqarivut, aamma ullormiit ullormut allanngortitseqattaarnissaq pinaveersimatinniarlugu, Augusta Salling oqarpoq.