Atassummut siulittaasutut qinigassanngortittoqarnialerpoq

Finn Karlsenip partiimit Atassummit siulittaasutut tunuarnerata kingorna siulittaasussatut suli qingigassanngortittoqanngilaq, tamannali immaqa ilimanarsilerpoq. Sermitsiami tamanna atuarneqarsinnaavoq.
juulip 30-at 2009 17:02

Godmand Rasmussen, Atassutip siulersuisuunerini ilaasortaasoq, Inatsisartunilu sinniisussat pingajuattut inissisisimasoq, siulittaasumut qinigassanngortikkusussinnaavoq, allanik piumasoqanngippat. Kalaallit Nunaata EU-mut ilaasortanngoqqinnissaa Godmand Rasmussenip suliniutigerusuppaa.

- Avatangiisivut allat tamarmik naalakkersuisooqatigiillutillu peqatigiittut uagut immikkoornissarput ilumoorsinnaanngilaq, Godmand Rasmussen oqarpoq.

Godmand Rasmussen partiip siuttuinik qinngarinneqisunut ilaavoq.

- Allakkat pingaarutillit Fnn Karlsenimit Jensine Berthelsenimillu siulersuisunut isertuunneqarsimapput. Allakkat taakku ilisimasaqarfigisimagaluarutsigik, Inuit Ataqatigiit, Demokraatit Kattusseqatigiillu naalakkersuisoqatigiissaannut periarfissaqarsimassagaluarpugut, Godmand Rasmussen Sermitsiamit apersorneqarluni oqarpoq.

Godmand Rasmussen oqarpoq, allakkami, namminerli tigumminngisamini, allassimasoqartoq, Atassut naalakkersuisoqatigiinnut akuusinnaagaluartoq, naalakkersuisunut ilaasortaasimasunik siulittaasumut qinigassanngortitsinngikkuni.

Atassut nuna tamakkerlugu immikkut ittumik Sisimiuni ataatsimeersuassaaq aggustip ulluisa 29-anni 30-annilu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq