Atassummi siulittaasumut qinigassanngortittut sisamaapput
Juunip aappaanni Inatsisartunut qinersinermi partip kinguariarujussuarnerata kingornagut Naalakkersuisunut ilaasortaasimasup Finn Karlsenip siulittaasutut tunuarnerata kingornagut siulersuisuunernik nutaanik qinersisoqassaaq. Tassami taamanikkut qinersinermi partiip qinersisartumi aamma Inatsisartunut ilaasortaatitami affai annaavai.
Taamanili partiimi eqqissiviilliortoqalerpoq, tamannalu sakkukinnerulinngilaq partiip aaqqissuussaanermini siulittaasuata tullia partiillu allattaa Jensine Berthelsen juuli naalersoq, partiimi aqutsisut akerliuniarfigalugit tatigisatut qinigaaffini tamaasa taamaatillugit, partiimit animmat.
Atassummut siulittaasunngorusullutik qinigassanngortittut sisamaapput. Tassaasut siornatigut Inatsisartunut ilaasortaasimasoq Godmand Rasmussen, Sisimiuneersoq, Jens Peter Mølgaard Qeqertarsuarmeersoq, Steen Lynge Nuummeersoq, Gerhardt Petersen Maniitsumeersoq, maanna Atassutip Inatsisartunut ilaasortaatitaani sinniisussaasoq.
Siulittaasumut qinigassanngortittut tallimaat Knud Kristiansen Upernavimmeersoq, Atassutip Inatsisartuni ilaasortaatitaanut pingasuusunut ilaasoq, piffissaq kingullerpaaq atorlugu qinigassanngortinnerminik tunuartitsivoq, ataatsimeersuarnermullu peqataaniarani nalunaarluni. Atassutip Inatsisartunut ilaasortaatitai allat marluk, tassa Finn Karlsen aamma Siverth K. Heilmann Sisiumiuni aamma ataatsimeersuaqataanngillat.
Aqagu ualikkut ataatsinut siulittaasussamik qinersisoqassaaq.
Taasisinnaallutik ataatsimeersuaqataasut 24-upput, taamalu aamma amerlatigisut ataatsimeersuarnermut ammasumut malinnaasuupput. Ilaasortanit ataasiakkaanit Atassutillu immikkoortortaqarfiinit siunnersuutit 30-t missaat oqaluuserineqartussaapput, Gerhardt Petersenillu oqaatigaa, ullumikkut naalakkersuinermut tunngasunik oqallittoqartoq, tamannalu naalakkersuinikkut suliniutissanik inerneqarniartussaavoq, Atassut taamaalilluni Nunatsinni partiit pisoqaanersaata tulliatut naalakkersuinikkut akooqqilerniassammat.
