Atassummi pissaaneqarniuunneq
Atassutip Nuummi immikkoortortaani siulittaasup, Folketingimut aamma qinigassanngortittup, Hans Lyberthip, ullumi nalunaarutigaa, Steen Lyngep partiimi siulittaasunngornissaa partiip innersuussutigigaa.
Atassut nuna tamakkerlugu sapaatip-akunnerata naanerani ataatsimeersuassaaq, Gerhardt Petersenilu tassunga atatillugu ippassaanikkunni ima oqarpoq:
- Siulersuisunit arlaleriarlunga kajumissaarneqareerlunga siulittaasumut qinigassanngortinniarlunga aalajangerpunga, unammillerteqassanerlungalu suli tusagaqanngilanga.
Maannali tassa unammillerteqalerpoq. Hans Lyberth ullumi ima allappoq:
- Steen Lyngep siulittaasutut suliassani kivilluarsinnaagaa Atassummiit isumaqarpugut, Folketingimullu qinersinermi, maanna naammassingajalersumi, qinigassanngortinnermini akisussaaffimmik tigusisinnaanini takutereerpaa.
Hans Lyberth aamma oqarpoq, innersuussinertik Gerhardt Petersenimut tatiginnikkunnaarnermik isumaqanngitsoq.