Atassummi isumaqatigiinnginneq
Nukissiorfiit pisortat pigisaattut aktiaateqarluni piginneqatigiiffinngortinneqarnissaat Atassutip 2008-mi itigartillugu taaseqataaffigaa. Maannalu partiimi qullersat isuma taannaallanngorteriasaarpaat, partiilli politikkikkut siulittaasuata tulliata Knud Kristiansenip isumaqataaffiginngilaa, Nukissiorfiillu aktiaateqarluni piginneqatigiiffinngortinneqarnissaa suli akerleralugu ersarissumik oqaatigalugu.
- Innuttaasunut atuisunullu kingunerlunnissaa ernumassutigaara. Taakkuuppummi akiliisussat.
Kikkut eqqugaanerpaassappat?
- Innuttaasut piniartukkormiut, aalisartukkormiut SIK-llu isumaqatigiissutaa malillugu akissarsiallit aammalu isorliunerusuni najugaqartut, Knud Kristiansen oqarpoq.
Knud Kristiansenittaaq partiimi isummaminik allanngortitseriataarnera paasiuminaatsittupilussuuaa.
- Atassutip sooq taamaaliornera … imaluunniit Inatsisartunut ilaasortaasut tamatuma isumassarsialanngorsimaneranik isumaqalersimanerat nassuiaatissaqartinngilara, aningaasanulli inatsimmit millionerpassuarnik pissarsisoqarsinnaanera kisiat peqqutaasinnaasoq, taannalu nassuiaatissatut taamaallaat tikkuarsinnaavara, Knud Kristiansen oqarpoq.
Partiip iluani isumaqatigiinngittoqalaarsinnaanera Atassutip siulittaasuata Gerhardt Petersenip ajornartorsiutit annertuutut isiginnginnerarpaa.
- Partiiuvugut annertuumik kiffaanngissuseqarfiusoq. Soorunami Kunuut nammineq isummersinnaatitaavoq soorlu aamma uanga taamaaliorsinnaasunga, oqarpoq.
Atassutip siulittaasua naapertorlugu partiip siunnersuummut siornatigut akerlerisimasaminnut akuersaaleriasaarnerannut aningaasanik pissarsisinnaaneq pineqarpoq. Aammattaaq partiip naalakkersuisooqataalernera soorunami peqqutaaqataavoq. Gerhardt Petersen oqaluttuarpoq Atassut siunnersuummik siornatigut akerlerisaminnut isumassarsisut ilagigaat.
- 2008-mi pissutsit allaapput, aamma Nukissiorfiit A/S-nngortinnissaannik uagut siunnersuuteqaqataavugut. Taamaaliornikkummi kiffaanngissuseqarnerulissaagut aningaasanillu pissarsisinnaalluta.
Gerhardt Petersenip Nukissiorfiit aktiaateqarluni piginneqatigiiffinngortinniarneqarnerinut ilaatigut tunngavilersuutigaa, taamaaliornikkut aningaasanik taarsigassarsiniarnissaq akikinnerulersinneqarsinnaammat. Akisussaaffeqarfimmut tassunga naalakkersuisuusimasup Jens B. Frederiksenip killormorluinnaq inissisimasoqarnera oqaatigaa. Gerhardt Petersenilli aamma Nukissiorfiit inissisimanerata allanngortinneqarnissaa ilumut isumassarsialatsiaanersoq taamatullu aalajangernermi ermilu inaarutaanera tunuartinngilaa, aammalu aalajangiussimasani inaarutaanera tunuartinngilaa.
- Periarfissat soorunami misissorniarpagut, taamaaliortoqarsinnaannginneralu paasinarsissagaluarpat soorunami taamaaliussanngilagut, Gerhardt Petersen oqarpoq. Nukissiorfiit aktiaateqarluni piginneqatigiiffinngortinneqarnissaat naalakkersuisooqatigiinnissamik isumaqatigiissummi erseqqilluinnartumik allassimagaluarpoq.
