Atassummi ilaasortaq: Misissuisoqarli

Meeqqat 22-t 1950-ikkunni Danmarkimut aallartinneqarnerat pillugu misissuisoqarnissaanik naalakkersuisut siulittaasuata, Kuupik Kleistip, kissaateqarnera, Atassutip siuliuttaasuata tullianit, Steen Lyngemit, isumaqatigineqarpoq.
Allattoq Jaaku Lyberth
septembarip 24-at 2009 07:29

Meeqqat 100-t sinnneqartut 1960-ikkunni Danmarkimut aamma aallartinneqarput, taakkua aamma misissuiffigineqarnissaat Steen Lyngep kissaatigaa.

- Suna pissutigalugu sunalu tunngavigalugu meqqat Danmarkimut aallartinneqarsimanerat mississorneqarluni qulaajarneqartariarpoq. Meeqqat 50-ikkuni 60-ikkunilu Danmarkimut aallartinneqarnerannut kina akisussaasuunersoq qulakkeerneqartariaqarpoq, Steen Lynge oqarpoq.

Meeqqat Danmarkimut aallartinneqarneranni Landsrådip qanoq inissisimanera qulaajarneqartariaqartoq, Steen Lynge isumaqarpoq.

- Isumaqarpunga Kalaallit Nunaata Danmarkillu akornanni naligiinneq naqissusissagutsigu pisariaqartoq pisimasut suut tunngavigalugit, kiallu akisussaaffigisaanik aalajangerneqarsimasut pillugit misissuinissaq pisariaqartoq, Steen Lynge oqarpoq.

- Inuit pineqartut inuttut pisinnaatitaaffi ataqqillugit eqqortumillu pineqassappata misissuinissaq pisariaqarpoq, Steen Lynge oqarpoq.

- Danmarkip Kalaallit Nunaannut tunniussarisimasai ajunngitsorpassuit Nunatsinni najugaqartunit qujamasuutigineqartut pineqanngillat, Steen Lynge oqarpoq.

- Qujamasunnerli tunngavigalugu pisimasut nalorninartoqartinneqartut misissuiffigineqarnissaasa tunuarsimaarfiginissaat tunngavissaanngilaq, Steen Lynge oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq