Ataqatigiissaarisutut tunuarpoq

Kujataani kommunit kattunnissaannut ataqatigiissaarisoq, Ole Mølgård Motzfeldt, piffissami kingullermi qassiiliuutigineqangaatsiareerluni ataqatigiissaarisutut tunuartariaqalerluni aalajangertariaqalersimavoq.
februaarip 22-at 2008 14:46

Qaqortumi Nanortalimmilu kommunalbestyrelsit piumasaraat Ole Mølgård Motzfeldt ataqatigiissaarisutut tunuassasoq, tassani qinikkatut sulinera pissutaatinneqarluni, tassami aalajangeeqataaffigisani suliarisussanngortarmagit.

Ole Mølgård Motzfeldt kommunalbestyrelsimut qinersinermi kingullermi Inuit Ataqatigiit tunulequtaralugit Narsami qinigaavoq, piffissallu ingerlanerani IA-miit tunuariarluni Siumumut nuulluni.

Tamatuma kingorna kommunaldirektørinngorami kommunalbestyrelsimit sulinngiffeqalerpoq, ataqatigiissaarisunngoramilu kommunaldirektøritut ukiarmi novembarimi sulinngiffeqaleraluarpoq.

- Politikkikkut qassiiliuutaanera naammagilerakku ataqatigiissaarisutut tunuarniuteqarnissara aalajangiuppara, Narsamilu borgmesteri kalerrissavara direktøritut ingerlaqqinnissara kissaatigalugu, tamannalu marsip aallaqqaataaniit pisussaassaaq, Ole Mølgård Motzfeldt radioaviisimut oqarpoq.

Kujataani politikkikkut aqutsisoqatigiinni siulittaasoq Nanortallip borgmesteria Kristine Raahauge oqarpoq, kommunimut qinersinissaq qanilleqimmat allamik ataqatigiissaarisussarsiortoqassanngitsoq.