Ataqatigiissaarisussamik atorfinitsitsiniarput
Narsap, Qaqortup Nanortallillu kommuniini politikkikkut qinikkat atorfilittallu 2009–mi kattukkunik politikkikkut qanoq aquttoqassanerlutik oqaluuserileruttorpaat.
Isumasioqatigiinneq Narsami ippassaq aallartippoq. Aallartiinnartorlu Narsarmiut siunnersuutigaat kattunnissap tungaanut sulianik ataqatigiissaarisussamik atorfinitsitsisoqarnissaa.
- Kujataani innuttaasut katillugit tamarmik 8000-it ataallugit amerlassuseqarput, politikkikkut qinikkat 68-iullutik. Narsami kommunalbestyrelsip kattunnermi kommunalbestyrelsinngortussat 17–iunissaat siunnersuutigaat nunaqarfinni aqutsisut ullumikkutut ingerlaannarlutik, Kujataamioqatigiit siulittaasuat Narsamilu borgmesteri Kiista P. Isaksen oqalugiarami ilaatigut taama oqarpoq.
Eqimattakkuutaat ullumikkut saqqummiussineranni ilaatigut siunnersuutigineqarpoq politikkikkut aqutsisunik pilersitsisoqarnissaa. Aamma kattunnissaq sioqqullugu suliassanik qulaarisussanik suleqatigiissitaliortoqarnissaa inassutigineqarpoq.
Arsuup Ivittuullu saaffigineqarnissaat ullumikkut saqqumiunneqarpoq, naak Ivittuut Nuummut isumaqatigiissuteqareeraluartoq. Aamma Ammassallip Kommunia Naalakkersuisullu isumaqatigiinniarfiginissaat isumasioqatigiit saqqummiussaasa ilagaat.
