Ataqatigiinnginneq

Silaannakkuinnaq angallassisoqarsinnaalernerata kingunerisaanik aammalu angalallannerit ataqatigiisaarneqannginnerat pissutigalugu, Island –imiit tallimanngornikkut tikittartussat Narsarsuarmiit Kujataani illoqarfinnut allanut ingerlanneqaqqissinaanngillat.

- Uagutsinnut tamanna kipiluttunartorujussuuvoq, tassami ilaqutariinnut Islandiliarusuttunut neqeroorutissaqaraluaratta, kisiannili Namminersornerullutik Oqartussat ataqatigiissaarisimanngimmata pivisunngortitsisinnaanngilagut, Petsi Høegh, Qaqortumi Takornariartitsiviup pisortaa oqarpoq.

- Helikoptereqartaraluarpoq. Tallimanngornermi aamma helikoptereqartaraluarpoq kisianni angallannermut tulluussagaanngilaq. Assersuutigalugu Air Iceland ualikkut kingusissukkut tikippat ingerlariaqqissinnaanngillat, Petsi Høegh oqarpoq.

Namminersornerullutik Oqartussat Air Iceland –illu akunnerminni isumaqatigiissutigimmassuk, sapaatip akunneranut marloriarluni Island –imiit Narsarsuarmut timmisartuussisoqartalissasoq, Namminersornerullutik Oqartussanit kujataani angallannerup ataqatigiissaarneqarnissaa akisussaaffigigaat, Petsi Høegh isumaqarnerarpoq.

- Privatinngorsaasoqarnikuuvoq.Aleqa Ittuk tunineqarnikuuvoq, Jakie Simoud –ip pisiarimmallugu kujataani angallanneq aaqqissuutissallugu. Kisianni tapiissutitaqanngitsumik tamakkuninnga ingerlatsiniarneq ajornartorujussuugami ajoraluartumik tamanna unitseqqippaa.