Atammimmi siunnersortimik atorfinitsitsineq kinguneqarluarpoq
Atammimmi pitsaaliuinermik siunnersortimik maajip aallaqqaataani atorfinitsitsineq kinguneqarluarpoq.
Atorfinitsinermi ilaatigut siunertarineqarpoq, kinguaassiutitigut atornerlunneqarsimasut ukioq 2000-ip missaanni saqqummeralersut ikiorserneqarnissaannik periarfissiinissaq.
Taamatuttaaq paasisitsiniaanerit assigiinngitsut, soorlu tupamut imigassamullu, aammali ulluinnarni atugaasut, soorlu sodavanditornerujussuup, qanoq sunniuteqartarnera pillugit atuartunut paasisitsiniaasarnissaq pilersaarutaavoq.
Pitsaaliuinermilu siunnersorti maanna sulillualereerpoq.
- Meeqqanut inuusuttunullu suliniaqatigiiffinnik aamma suleqateqarpunga, assigiinngitsunillu aaqqissuussisalereerluta. Henrik Mikaelsen nassuiaavoq.
Aamma arnat angutillu atornerlugaasimasut oqaloqatigiittarfiinik ikorfartoqatigiiffiusunik pilersitsisoqarsimavoq atorluarneqartunik. Taamaattumik suliniutit maannamut iluatsilluartutut taaneqarsinnaanerarpai.
- Siornatigut imigassamik atuisoqarnerusimagaluarpoq, maannali ikinnerulersimasutut isikkoqarput. Malunnartumik inuunerup naleqassusaanik pingaartitsisoqarnerulersimavoq. Henrik Mikaelsen erseqqissaavoq.