Atammimmi pitsaaliuisumik atorfinitsitsilerput
novembarip 22-at 2004 14:56
Atammimmi pitsaaliuinermik siunnersortimik aappaagu atorfinitsitsiniarluni Maniitsup Kommunalbestyrelsea tallimanngormat ataatsimiinnermini aalajangerpoq, massakkullu inuttassarsiuunneqalereerpoq.
- Januaarip aallaqqaataani 2005-imi atorfinitsitsiniarpugut, 206.000 koruunillu aningaasartassai kommunalbestyrelsep akuersissutigai, borgmester Siverth K. Heilmann oqarpoq.
Siunnersorti Maniitsup Kommuneata aallaqqaammut aningaasalersorallassavaa, kingusinnerusukkulli ingerlanneranut Paarisa akuulerumaartoq neriuutigineqarpoq.
- Pitsaanerpaassaaq Paarisa Maniitsup Kommuneatalu aningaasartuutissat avittalersinnaappatigik, tamatta ukiumut 100.000 kr.-nik aningaasaliisarluta. Siverth K. Heilmann erseqqissaavoq.
