Ataavartumik takornarianik sullissineq piumasarineqarpoq

Ataavartumik nunatsinnukartitsisinnaanermik neqerooruteqarsinnaaneq kiisalu paasissutissiijuarallarneq takornariaqarnerulernissamut aqqutaapput. Politikikkut piumasaqaatit naammassineqassappata ilaatigut tassaasut takornariat aningaasaateqarluartut amerlanerusut nunatsinnut takornariartinneqarnissaat, piumasaqaataavoq ataavartumik sullissinerup ingerlanneqarnissaa.

Takornariatitsisartut naapittakkatta piumasaraat ataavartumik assersuutigalugu timmisartuussisoqartarnissaa, taama oqarpoq Niels Ferup Nunatta takornariaqartitsinermut inuussutissarsiornermullu siunnersuisooqatigiivini nittarsaassinermut pisortaasoq.

- taamaammat nuannaarutigeqaarput Air Greenlandip ukiup tullissaanut Baltimorimut timmisartuussiinnarnissartik aalajangiummassuk, Niels Ferup oqarpoq.

Takornariat ataavartumik ingerlatsisoqarnissaa piumasaqaatigaat ingammillu takornariat aalajangersimasut politikkikkut siunniunneqartut.

Nunatta takornariaqarnermut inuussutissarsiornermullu siunnersuisooqatigiivisa USA-mi suliniutitik maj 2006 –imili annertusingaatsiarpaat.

Ilaatigut CNN-mi nunarsuaq tamakkerlugu aallakaatinneqartumik ullut tallimat sermersuarmiit toqqaannartumik aallakaatitsisoqarpoq aamma Air Greenland suleqatigalugu USA –mi raadioqarfik 30 millioninik tusarnaartulik nutsinnit toqqaannartumik aallakaatitsipput.