Ataatsimut katiterineq meeqqanut inuusuttunullu atugassarititaasunik pitsaanerulersitsissaaq
Meeqqanut, Inuusuttunut Ilaqutariinnullu Naalakkersuisoqarfik Isumaginninnermullu Aqutsisoqarfik ataatsimut aappaagu kattunneqassapput.
Kattussinermi suliniutit akornanni ataqatigiinnerulersitsineq taavalu innuttaasut pisariaqartitaannut naapertuuttumik sulinerup inatsisitigut tunngavinnit erseqqinnerusunit ikorfartorneqarnissaata qulakkeerneqassaaq.
Meeqqanut, Inuusuttunut Ilaqutariinnullu Naalakkersuisoqarfik tusagassiuutinut nalunaarummi taama allappoq.
- Suliniuteqarneq maanna ullut tamaasa ingerlanneqareersoq nangillugu ineriartortissavarput. Immikkoortortallu katitikkap meeqqanut inuusuttunullu atugassarititanik toqqissisimanartunik pitsaasunillu pilersitsinissatsinnut suli pitsaanerusumik periarfississavaatigut, Meeqqanut, Inuusuttunut Ilaqutariinnullu Naalakkersuisoq, Mads Pedersen taama oqarpoq.
Kattussineq suleriaatsinik tamakkiisumik isiginninnerulernissamut, aamma sulisoqarnikkut isumalluutinik atorluaanerunissamut kiisalu isumaginninnermut suliassaqarfiup iluani pisortani immikkoortortat ikinnerulernissaannut periarfissiissasoq, tusagassiuutinut nalunaarummi allaqqavoq.
Kattussineq januaarip aallaqqaataani 2026-mi atuutilissaaq. Piffissami aggersumi aaqqissuussanerup nutaap qanoq isikkoqarnissaa pillugu aalajangersaanissamut siunnerfilimmik suliaqartoqassaaq.
