Ataatsimut isigalugu: Timmisartuutileqatigiiffimmi isumaqatigiinnginnermi maanna ima pisoqassaaq
Taamaammat suliumajunnaartoqarnissamik aarlerisaaruteqartoqarpoq:
Air Greenland aamma Timmisartumi Sulisut Kattuffiat (FPU) Københavnimi isumaqatigiissitsiniartarfimmi siullermeerlutik ataatsimiilerput.
Air Greenland FPU-lu timmisartumi saqisunut nutaamik isumaqatigiissuteqarnissamut isumaqatigiissinnaanngillat. Taamaammat FPU suliumajunnaartoqarnissaanik aarlerisaaruteqarpoq.
Timmisartumi saqisut akissarsiaqarnerulerusupput. Air Greenlandillu tamanna ilaatigut ammaffigaa, tamannali timmisartumi saqisut suliffiup piffissaanut atatillugu aalaakkaannerunissaanik piumasaqaatitaqarpoq.
Piumasaqaat tamanna FPU-p malikkusunngilaa:
Isumaqatigiissitsiniartarfik
- oqartussaavoq sulisitsisut sulisullu nutaamik isumaqatigiissuteqarnissamut isumaqatigiissinnaanngikkaangata akuliuttartoq.
- aaqqiagiinnginnerit aamma suliumajunnaarnerit mattussinerillu pinngitsoortinnissaannik sulissuteqartarpoq.
- illuatungeriit isumaqatigiinniarnissaannut pinngitsaaliisinnaavoq, akornannilu isumaqatigiissitsiniartuusinnaalluni.
- suliujumajunnaarnissat mattussinissallu sapaatini akunnerni marlunni kinguartinnissaanut pisinnaatitaaffeqarpoq.
- Sankt Annæ Pladsimi Københavnimiippoq.
Paasissutissarsiffik: forligsinstitutionen.dk
- Sulisut eqqartukkagut tassaapput ajornartoornerni assigiinngitsuni suliffeqarfimmut ikiuuttuartarsimasut. Suli coronamik ajornartoortoqanngitsoq, ajornartoornerup nalaani kingornalu kiisalu aasaq manna ajornartoornerup nalaanni sulisut suliffeqarfimminut akisussaassuseqaqqissaarsimapput, taanna oqarpoq.
Air Greenlandimi sulisut 540-t coronap ilungersunarnerpaaffigisaani 2020-mi marsimi apriilimilu akissarsiassaasa 50 procentii tikillugit unitsinneqarallarput. Air Greenlandilu soraarnerussutisiassanut akiliuteqanngikkallarnissamik aamma akuerineqarpoq.
Maanna ima pisoqarpoq:
Illuatungeriit maanna aaqqiagiinngissuteqarluinnarmat pingajulerneqartariaqarput – tassa isumaqatigiissitsiniartartoq – taanna isumaqatigiissuteqartoqarsinnaanissaanut ikiuutissaaq.
KNR-ip Air Greenland aamma FPU oqaaseqartinniarsarigaluarpai, taakkuli isumaqatigiinniarnerit ingerlatillugit nipangiusimasussaatitaagamik oqaaseqarsinnaanngillat.
Isumaqatigiinniarnerit qanoq sivisutiginissaat ilisimaneqanngilaq.
Kangerlussuarmi - imaluunniit nunatta sinnerani mittarfinni juullimut timmisartumut immaqa ilaasussaqarnavianngilaq. Assi: Christine Hyldal/KNR
Taakku tallimanngorneq decembarip aappaata tungaanut isumaqatigiinniassapput. Isumaqatigiissinnaanngikkunilli suliumajunnaartoqarnissaa FPU-p aarlerisaarutigaa.
Timmisartuutileqatigiiffik kingusinnerpaamik sisamanngornermi ualikkut – tassa isumaqatigiissuteqartoqanngippat suliumajunnaartoqarniarneranut ulloq sioqqullugu nalunaaruteqassallutik KNR-imut paasissutissiissutigaa.
Isumaqatigiissitsiniartartulli suliumajunnaartoqarniarnerata kinguartinneqarnissaa piumasarisinnaavaa.
Tassa imaappoq isumaqatigiissitsiniartartup suliumajunnaartoqarnissaanik ullunik 14-inik tassa decembarip ulluisa 16-iannut kinguartitsisinnaavoq. Aaqqiagiinngittoqarneranilu aaqqiissutissarsisoqanngippat suliumajunnaarniarneq sapaatinik akunnernik marlunnik tassa decembarip ulluisa 30-anut kinguartinneqaqqissinnaalluni.
Isumaqatigiissitsiniartartoq taamaaliussaguni timmisartut nalinginnaasumik angallassissapput.
Kingullermik poorskikkut nalaanni apriilip aallartinnerani suliumajunnaartoqarnissaanik aarlerisaaruteqartoqarpoq.
Kisianni suliumajunnaartoqanngitsorluunniit tamanna taamaatiinnarneqarpoq. Dansk Metalimi Air Greenlandilu Københavnimi isumaqatigiissitsiniartarfimmi apriilip aappaani nutaamik isumaqatigiissuteqarput.
Illuatungeriit Isumaqatigiissitsiniartarfimmi ulloq ataasiunngitsorluunniit isumaqatigiinniareerlutik nutaamik isumaqatigiissusiorput.
Air Greenland aamma FPU nutaamik isumaqatigiissuteqarsinnaanngippata isumaqatigiissitsiniartartoq siunnersuuteqarsinnaavoq, tamannalu illuatungeriit taasissutigisinnaallugu.
Suliumajunnaartoqassappat:
2022-mi decembarip aappaata 16-iatalu akornanni angalasussaaguit billettissat utertissinnaavat.
Aamma billettit allanngortissinnaavat.
Angalanissat allanngortissagukku Air Greenlandip nittartagaanut isissaatik. Billettili angalatitsivimmit allamit pisiarisimagukku taakku attavigissavatit.
