Ataatsimut isigalugu: Borgmesterit nutaat aaku
Kommunimut qinersisoqarneranit sapaatip akunnera qaangiuppoq.
Nunatsinni kommuninit tallimanit sisamat borgmesterissamik aalajaneereerput - Aasiannili borgmesterip allaffia suli inuttaqanngilaq.
Borgmesteriusimasunit tallimanit marluk maannamut qinigaaqqipput.
Charlotte Ludvigsen qinersinerup unnukkuani nuannaangaatsiarpoq. Assi: KNR
Kommuneqarfik Sermersuumut Charlotte Ludvigsen (IA) 1.512-init taaguunneqarpoq, taamaalillunilu illoqarfiit pingarnersaanni qinigaaqqilluni.
Kommunalbestyrelsilli qanoq aaqqissuunneqarnissaat pillugu isumaqatigiinniarnerit suli naammassineqanngillat.
Malik Berthelsen. Assi: KNR
Qeqqata Kommunia aamma taama pisoqarpoq.
Tassani borgmesteri, Malik Berthelsen (Siumut) 976-init taaguunneqarluni borgmesterip allaffianneeqqinnissamut qinigaavoq.
Tassuma Inuit Ataqatigiit Atassullu isumaqatigiissuteqarfigai - Maniitsumilu Sisimiunilu nalkuttarfiit ukiunut sisamanut tulliuttunut pilersaarutaapput.
Stine Egede. Assi: Inuit Ataqatigiit
Kommune Kujallermi allanngortoqarpoq. Siumumit Kiista P. Isaksen borgmesteriugunnaarluni Inuit Ataqatigiinnit Stine Egede borgmesterinngorpoq.
Taanna 410-nit taaguunneqarluni - allanit tamanit taaguunneqarneruvoq.
AAMMA ATUARUK Stine Egede: Borgmesteriunissaq toqqarlugu Inatsisartuniinnissaq qininngilara
Kommunalbestyrelsit suli aalajangerneqanngillat.
- Gruppimi ataatsimoornikuuvugut. Inuit Ataqatigiit sinnerlugit 20-t missaanniittut qinigassanngortipput. Ataatsimoorluarpugulli – sunalu anguniarnerlugu isumaqatigiissutiginikuuarput. Kuannersuarni aatsitassarsiornissamut suliniummut atatillugu ersarissumik oqariartuuteqarpugut. Kuannersuit ammarneqassanngilaq – taamalu isumaqarnerput allanngortinnavianngilarput, Stine Egede KNR-imut qinersinerup aqaguani oqarpoq.
Minik Høegh-Dam (Siumut) aamma Naleqqamit Anthon Frederiksen. Assi: Avannaata Kommunia
Avannaata Kommuniani borgmesteritut atuuffiup inissinneqarnissaa sapaatip akunnerata naanerani pisoqarfiungaatsiarpoq.
Borgmesteriusimasoq, Palle Jeremiassen kommunimi taaguunneqarnerpaap tulliuvoq - taassumali Siumumit tunuarnissani arfininngormat nalunaarutigaa. Taassuma suna pissutiginerlugu suli oqaatigerusunngilaa.
Minik Høegh-Dam aamma Siumumeersoq kommunimi nutaatut borgmesterinngorpoq.
AAMMA ATUARUK Palle Jerimiassen Siumumut ilaasortaajunnaartoq
Taanna 406-init taaguunneqarpoq Palle Jerimiassenilu 338-nit taaguunneqarluni.
Nunatta avannarpasinnerpaataani Naleraq Siumullu kommunalbestyrelsinngorput.
Siumut Nalerarlu kommunalbestyrelsimut atuuffinnit 17-init ataatsimut qulinik atuuffeqalerput.
Inuit Ataqatigiinnit Peter Olsen
Taavalu Kommune Qeqertalik. Kommunimi tassani kina borgmesterinngussanersoq suli aalajangerneqanngilaq.
Tassani Inuit Ataqatigiinnit Peter Olsen maanna borgmesteriusumit parteeqatiminiillu Ane Hansenimit taaguunneqarneruvoq. Taanna 442-nit taaguunneqartoq Ane Hansen 387-init taaguunneqarpoq.
Taanna borgmesterinngussanersoq ullumi ataasinngornermi suli erseqqissaatigineqanngilaq. Peter Olsenilli partiit allat isumaqatiginiarnerat siuttuuffigaa.
AAMMA ATUARUK Borgmesteri naalakkersuisorluunniit? - Peter Olsen nalornisoq
- Isumaqatigiinniarnerit torersumik eqqissisimasumillu ingerlanneqarput. Isuamqatigiinniarnerit inissippata nalunaaruteqassaagut, Peter Olsen KNR-imut oqarpoq:
- Inuit Ataqatigiit amerlanerussuteqarnerat pissutigalugu isumaqatigiinnianngiinnarsinnaagaluarpugut, partiilli tamarmik isumaqatiginiarusuppagut, isumaqatigiinniarnerillu taakku maanna ingerlappagut.
Peter Olsen Inatsisartunut aamma qinigaavoq.
Taassuma nukissani kommunerisamini nunatsinnilu politikkimut atussanerlugit nalornissutigalugu KNR-imut sapaatip akunnerata siuliani oqaatigaa.