Ataatsimoortumik tapiissutit ikinnerpaamik ukiuni 25-ni isumalluutigiinnartariaqassavagut
Nalunaarusiaq Nuummi Københavnimilu ilisimatusarfinnit aningaasalersorneqartoq nunani avannarlerni ilisimatuunit 13-init suliarineqarpoq. Kalaallit Nunaata aatsitassarsiornikkut aningaatigut annertuumik iluanaaruteqarsinnaaneranik misissuineruvoq, misissuinermillu angusat ilungersunartutut oqaatigisariaqarput.
Danmarkimit ataatsimoortumik tapiissutaasartut ukiumut 3,6 mia. koruunit missaanniittut aatsitassanik piiaanikkut isertitanit taarserneqassappata, aatsitassarsiorluni suliniutit angisuut 24-it pilersinneqartariaqassapput. Allatut oqaatigalugu, piiavimmik ataatsimik ukioq allortarlugu sanaartortoqartariaqassaaq. Suliniutinut angisuunut marlunnut akuersissutit tunniunneqarsimasut eqqarsaatigissagaanni, tamatuma anguneqarnissaa ungasissupilussuartoq isikkoqarpoq. Nalunarusiamittaaq oqaatigineqarpoq Kalaallit Nunaata aatsitassanik piiaaveqarneriinnakkut nammineerluni ingerlalersinnaanissaa piviusorsiortuunngitsoq.
Ujarassiuutut professorip Minik Rosingip, ilisimatusartoqatigiinnut siulittaasuusup, aatsitassanik piiaaviit Kalaallit Nunaata aningaasarsiornikkut namminiilivinnissaanut siunissami isumalluutigineqalersinnaanerat aamma takusinnaannginneraraa, Politikeq allappoq.
