Ataatsimoortumik tapiissutit eqqartorneqalerput
Namminersorneq pillugu isumalioqatigiisitat maanna oqaluuserisassat pikkunarnersaasa ilaat eqqartortussanngorpaat. Tassalu; ataatsimoortumik tapiissutit siunissami qanoq pineqarnissaat eqqartorneqartussanngorput. Isumalioqatigiissitallu qanittukkut Danmarkimi aningaasaqarneq pillugu ataatsimiipputtaaq.
Isumaqatiginninniarnermi illuatungeriit imminnut ungasittut Demokraatini ilaasortap Per Berthelsenip ullumi AG saqqummersoq aqqutigalugu nalunaarutigaa. Danskit peqataarusuppiannginnerat ungasiliartuutaasimasoq Per Berthelsenip tunngavilersuutigisimagaa atuarneqarsinnaavoq.
Isumasioqatigiissitat septembarimi siunnersuutertik saqqummiuttussaavaat.
- Saqqummiukkusutat maanna saqqummiunneqarnissaannut piffissanngorsimasoq isumaqatiginninniarnerillu unittoorsimanngitsutut Isumalioqatigiissitami siulittaasup Socialdemokratineersup Frank Jensenip oqaatigaa.
- Uanni kalaallit danskillu avissaartuussimasutut isikkoqanngillat. Septembarip ulluisa 30-at nallertinnagu siunnersuutigut saqqummiuttussaavagut. Frank Jensen oqarpoq.
Taanna aperaarput ippassaq aningaasaqarneq pillugu eqqartueqatigiinnerat qanorissimanersoq, ima akivoq:
- Uatsinnut qanilliartortilluta pikkuttakkaluttuinnarpugut. Kalaallit Nunaata namminersulivinnissaata eqqartornerani aningaasaqarnerup inunnut ataasiakkaanut pingaaruteqarnera tamatta nalunnginnatsigu eqqartugarput imannaanngitsuuvoq, Frank Jensen oqarpoq.
Taanna apeqqipparput illuatungeriinnik ungasinninneraasimaneq malugisimaneraa, imalu akivoq:
- Oqarusunngilanga illuatungeriit ungasittut oqarusunneruvungali akisussaassuseqartumik Kalaallit Nunaanni innuttaasut ataasiakkaat siunissami aningaasaqarnikkut toqqissisimanissaannik illersuisoqartartoq. Taamatullu oqallinnermi isummat erseqqinnerusumik oqaatigineqartarnissaat uanga kissaatigaara, Frank Jensen oqarpoq.
Radioaviisimit paasisavut naapertorlugit ataatsimoortumik tapiissutit marlunnik siunnersuusiorfigineqartussaapput. Aappaa imatut imaqartoq paasivarput: tapiissutit allanngortinneqaratik nammineq assigiinngitsunik aningaasalersuinermik ilaqartinneqassapput.
