Ataatsimoortumik komitii ataatsimiissaaq

Joint Committee, tassalu ataatsimoorussamik kommitte Kalaallit Nunaata, Danmarkip aamma USA-p suleqatigiiffigisaat, aappassaanik ullumi aqagulu ataatsimiissaaq.

Tamanna Washingtonimi pissaaq, inuussutissarsiutitigut siuarsaanissamut nittarsaassinissarsuaq ullunik marlunnik sioqqullugu.

Kommitte attaveqaammik pilersitsereerpoq, ilaatigut avatangiisit, ilisimatusarneq, peqqinneq, teknologi, ilinniartitaaneq kulturilu pillugit. Taakku saniatigut niueqatigiinnikkut takornariaqarnikkullu ineriartortinneqarsinnaasut pillugit aamma attaveqaammik pilersitsisoqarpoq, taakkuuppullu ulluni tulliuttuni pineqartussat.

Ataatsimiinnermi suliniutit aalajangersimasut saqqummiunneqassapput, soorlu Alaskap Kalaallit Nunaatalu ilinniartitaanikkut suleqatigiinnerannut, USA-mut ilinniariartorsinnaanermut, qarasaasiaq atorlugu ilinniartitsinermut qarasaasiaqarnermullu tunngasut saqqummiunneqassallutik.

Joint Committee illersornissamut isumaqatigiissummut tapiliussaavoq, isumaqatigiissut Igalikumi siorna aggustip arferngani atsioqatigiissutigineqarluni.

Isumaqatigiissummi aamma USA-p Kalaallit Nunaatalu aningaasaqarnernikkut teknikkikkullu suleqatigiinnissaannut tunngasut ilanngunneqarsimapput.