Ataatsimoortumik kattuffeqalernissaat ilassilluarneqarpoq
Atuartitsinermik suliaqartut tamarmik ataatsimoortumik kattuffeqalernissaannik IMAK-imi siulittaasup, Sivso Dorphip, siunnersuutaa ilassilluarneqarpoq, nangaassuteqartoqarlunili.
Nuummi Niuernermik Ilinniarfiup pisortaa, Inger Graven Larsen, Niuernermik Ilinniarfimmi ilinniartitsisut sinnerlugit qanoq kattuffeqarusunnerat oqaatigisinnaannginnerarpaa, taamaattorli atuartitsinermik suliaqartut tamarmik suleqatigiinnissaasa iluaqutissartaqarnera nammineerluni takusinnaanerarpaa. Ataatsimut kattuffeqarnikkut ilinniarfiit assigiinngitsut isumaqatigiissutaat ataqatigiissaarneqarsinnaapput.
Ilinniagartuut Kattuffianni siulittaasoq, Flemming Guntofte Nielsen isumaqarpoq, atuartitsinermik suliaqartut ataatsimut kattuffeqalernissaannut suli piffissanngorsimanngitsoq, taamaattorli kattuffiit pitsaanerusumik suleqatigiittariaqarnerat isumaqatigaa.
- Ataatsimut kattuffeqalernissamik maannakkuugallartoq pisariaqartitsinngilagut, taamaattorli isummat ataatsimoorussat pillugit, malittarisassanillu ataqatigiissaarineq pillugu, suleqatigiissinnaavugut.
