Ataatsimiititaq killuunneqartutut misigisimavoq
Ataatsimiitaliami siulittaasup Ane Hansenip Naalakkersuisut paasissutissiisarnerat pitsaanerusoq piumarisaraa.
Nunatsinnut pingaarutilerujussuit pitinnagut Naalakkersuisut ataatsimititaliallu sunik tamanik ilisimatittassagaat, Nunanut allanut tunngasunut naalakkersuisumut piumasarivarput, ataatsimiititaliallu taama kissaateqarnera naalakkersuisumut apuupparput, Ane Hansen oqarpoq.
Sanngiillisinneqarpugut, ataatsimiititaliaavugut pimoorussisut pineqartorlugu pillugu ilungersorluta sulilluta,
uanilu suliami killuunneqartutut misigisimavunga, Justus Hansen tupaallaqqasoq oqarpoq.
Vittus Qujaukitsup Kalaallit Nunaat sinnerlugu Danmark naalagaaffiit peqatigiinnut naalakkersuisut inatsisartullu avaqqullugit maalaarutigisimagaa, Naalakkersuisut siulittaasuata Kim Kielsenip qulakkeerlugu ippassaq oqaatigaa.
USA saliinissamut akisussaaffiinik sumiginnaasimasutut Danmark unnerluutigineqarluni, nunattalu Pituffimmi aningaasatigut qulakkeerinnittoqarsimanngimmat, maalaarutit apriilimi nassiunneqarput.
Nunanut allanut tunngasunut naalakkersuisup Suka K. Frederiksenip ippassaq oqaluttuaraara maalarutigineqartup utertineqarnissaa Naalakkersuisut aalajangersimagaat.
Inatsisartut nunanut allanut tunngasunut sillimaniarnermullu ataatsimiititalimi siulitaasuata Ane Hansenip naalagaaffiit peqatigiinnut maalaaruteqarneq Kalaallit Nunaata isigineqarneranut innarliiinerarpaa.
- Tunuliaqutarani taama iliorneq innarliivoq aqqikkuminaatsorujussuaq aamma akueriuminaatsorujussuaq, Ane Hansen oqarpoq.
Naalakkersuisuusimasunut tatiginninneq innarlerneqartoq, Ane Hansen oqarpoq.
- Naalakkersuisuusimasumut tatiginassuseq innarlerneqarpoq, kisianni Nunanut allanut Tunngasunut Naalakkersuisunngortoq tatigaarput, angusaqarnissani siunertaralugu sulissasoq piumsarigatsigu, Ane Hansen Inuit Ataqatigiit, inatsisartut Nunanut Allanut tunngasunut Sillimaniarnermullu ataastsimiititaliami siuliuttaasoq oqarpoq.
Naalagaaffiit Peqatigiinnut maalaaruteqarnissamik sioorasaarut danskit taamani nunanut allanut ministeriannut allakkani saqqummiussisimalluni, nunanut allanut sillimaniarnermullu ataatsimiititaliaq ilisimatissimallugu Vittus Qujaukitsup pingasunngormat KNR-imut oqaatigaa.
Qujaukitsorlu taama nassuiaateqarnermini piginnaatitaaffeqalerluni isumaqarpoq.
Nunanulli allanut sillimaniarnermullu ataatsimiititaliaq ataatsimoorussamik tusagassiuutinut nalunaaruteqarluni appisaluussivoq.
- Ataatsimiititaliap naluaa suna pissutigalugu taamanikkut Nunanut allanut Naalakkersuisuusoq isumaqalersimanersoq sioorasaaraluni allakkiami nassiussimasami assilinerinik ataatsimiititaliamut nassiussinikkut sioorasaarutit timitalerneqarnissaannut piginnaatinneqarsimalluni, ataatsimiititaliaq allappoq, nangillunilu.
- Ilanngunneqarsinnaavoq sioorasaarutitalimmik allakkiaq taamatuttaaq siumoortumik Nunanut Allanut Sillimaniarnermullu Ataatsimiititaliamut saqqummiunneqarsimanngimmat, ataatsimiititaliaq allappoq.