Ingammik Avannaani umiatsiaararsorluni aalisarfiusuni pingasuni - tassa Qeqertarsuup tunuani, Uummannami Upernavimmilu qaleralinniarnerup killiffia ilungersunarpoq.Assi: Kåre Hendriksen

Ataatsimiititaliarsuaq qaleralinniarneq pillugu: Killiffik attanneqarsinnaanngilaq

Sinerissap qanittuani qaleralinniarnermi killiffiup ilungersunarnera Avannaani qaleralinniartut amerlavallaarnerannik angisuunillu qaleralittoqarpiartarunnaarneranik peqquteqartoq, ataatsimiititaliarsuaq isumaqarpoq.

Aalisarneq pillugu Ataatsimiititaliarsuaq aalisarnermut inatsisissamut nutaanik isumaliutissiissusiuleruttorpoq. Taamaammat ataatsimiititaliarsuaq qaleralinniarneq pillugu allakkiaqarpoq.

Sinerissap qanittuani qaleralinniarnermi killiffiup ilungersunartoq, ataatsimiititaliarsuaq Grønlandsbankenitulli erseqqissaavoq. 

Ingammik Avannaani umiatsiaararsorluni aalisarfiusuni pingasuni - tassa Qeqertarsuup tunuani, Uummannami Upernavimmilu qaleralinniarnerup killiffia ilungersunarpoq.

Siullermik umiatsiaararsorlutik aalisartut amerlavallaarput. Tassa imaappoq, umiatsiaararsortut qaleralikilliartornera qaleralittallu milliartornerat eqqarsaatigalugit amerlavallaarput.

AAMMA ATUARUK Grønlandsbanken: Aalisartut inuunerissaarnissaminnut isertitaqarniarlutik ilungersortut amerligaluttuinnarput

Umiatsiaararsorluni aalisarnermut 2013-ip 2020-llu akornanni akuersissutitut tunniussat amerlingaatsiarsimasut, ataatsimiititaliarsuaq allappoq. Assersuutigalugu Qeqertarsuup tunuanut tunniussat 59 procentinik, Uummannamut tunniussat 37 procentinik Upernavimmullu tunniussat 31 procentinik amerlipput.

Umiatsiaararsortut amerliartornerisa ilutigisaannik, Pinngortitaleriffiup 2013-ip 2020-llu akornanni qaleralittassiissutigeqqusaat ikiliartorput.

Pinngortitaleriffiup qaleralittassiissutigeqqusartagaata ikiliartornerat, aalisartunut tamanut pissutsit ajorseriaannarnerannik kinguneqarsinnaasumik qaleralikilliartorneranik qaleralittallu milliartornerannik ersersitsisoq, ataatsimiititaliarsuaq allappoq.

Umiatsiaararsortut ilarpassui allanit agguaqatigiisillugu aningaasarsiakinnerusut

Umiatsiaararsortut allanit agguaqatigiisillugu aningaasarsiakinnerusortaqartut, ataatsimiititaliarsuup maanna upernarsarsinnaavaa. 

Agguaqatigiisillugit isertitat qaleralinniarnerlu

 

2019-mi isertitat agguaqatigiissillugu 259.000 koruuninik annertussuseqarput.

 

Umiatsiaararsorlutik qaleralinniat 2020-mi tunisaat katillutik 335 mio. koruuninik naleqarput.

 

Umiatsiaararsortut 2020-mi agguaqatigiissillugu tunisaasa nalingi 335.643 koruuniupput.

 

Umiatsiaararsortut tallimaagaangata ataaseq 2020-mi ataatsimut tunisaata nalingat 100.000 koruuninit appasinnerupput.

Umiatsiaararsortut tallimaagaangata marluk 200.000 koruunit nalinginut tunisisarput.

 

Tusarfik: Aalisarnermut ataatsimiititaliaq. 

Umiatsiaararsortoq nunatsinni allat ilanngaaseereerluni agguaqatigiisillugu aningaasarsiaqartiginiaruni aalisarneq pingaarnertut inuussutissarsiutigisariaqaraa, ataatsimiititaliarsuaq erseqqissaavoq. 

Tassa imaappoq, umiatsiaararsortoq tunisinermi kiilumut 19 koorunisissutissaminik ukiumut 21 tonsinit ikinnerunngitsunik qaleralissimasaqariaqarpoq. Tamanna ilanngaaseereerluni ukiumut 266.000 koruunit missaannik isertitaqarfigissavaa.

2020-mili umiatsiaararsortut pingajorarterutaasa missaannaata 20 tonsinik amerlanerusunilluunniit qaleralissimapput.

Killiffik tamanna attanneqarsinnaanngitsoq qaleralinniarsinnaajunnaarnissamullu piffissaq apeqqutaaginnaleqqasoq, ataatsimiititaliarsuaq allappoq.

Assersuutigalugu qalerallit procentinik 30-nik akikillineqassappata, aalisartoq isertitani attatiinarniarunigit 31,5 tonsinik aalisartariaqartassaaq.

Aalisarnermut ataatsimiititaliarsuaq allaleruttortoq

Avannaani qaleralinniarnermut isumaliutissiissutigineqartumut tunngatillugu Ataatsimiititaliarsuarmi siulittaasup, Jens Paulsen, annertunerusumik oqaaseqarsinnaanatik KNR-imut oqarpoq.

AAMMA ATUARUK Aalisarneq pillugu ataatsimiititaliarsuaq suliaminik inaarsaalersoq

Isumaliutissiissut Aalisarnermut ataatsimiititaliarsuarmiit saqqummiunneqartoq, aalisarnermik inuussutissarsiornermut innersuussuteqanngilaq.  Isumaliutissiissut ilungersuutigineqartunut nassuiaasersuutaanaavoq, ataatsimiititaliani ilaasortat innersuusinissaminnut ilisimasassanik tunngavissatut atorsinnaaniassammassuk. 

Ataatsimiititaliarsuaq aalisanermut inatsisissamut isumaliutissiissummik suliaqarnissaminut 2019-miilli aalajaatsumik sulivoq.

Ataatsimiititaliarsuaq Naalakkersuisunut isumaliutissiissummut inaarutaasussamik nalunaarusioriaananngorput.

Ataatsimiititaliarsuup juunip naanerani isumaliutissiissutit naammassissangatippai. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat