Ataatsimiititaliarsuaq: Aalisartut ikinnerulerunik isertitaqarnerulissapput

Aalisakkat akisuallaanngillat, taamaammallu isertitaqarluarniaraanni aalisagarluarnissaq pisariaqarpoq. Aalisagartassallu killeqarmata taava tupinnanngitsumik aalisartut ikittuinnaasariaqarput, taakkua isertitaqarluassagunik, Chresten Sørensen nassuiaavoq.

Taanna oqarpoq, aalisartut amerlasuujunissaat aalajangiusimaannaraanni, taava aalisartut piitsuujuarnissaannut – imaluuniit isertitakittuarnissaannut – eqqartuuneqartutut oqaatigineqarsinnaasut.

- Maannakkut suliassaat tassaavoq, aalisarnermik inuussutisarsiuteqalerusuttut killilernissaat. Maanna aalisartuusut utoqqalilereersullu allani sulilersinnissaat pisariaqanngilaq. Kisianni paasinissaa pingaarpoq, aalisarnerup aaqqissuuteqqinnera ima sivisutigissammat, allaat aalisaleqqaarsussaagaluit allani suliffeqalersinnerisigut aalisartut ikilisinnissaat naammassineqarsinnaammat, aalisarneq pillugu ataatsimiititaliarsuup siulittaasua oqarpoq.

Ataatsimiititaliarsuup aamma siunnersuutigaa, aalisariutit ikilisinneqassasut.

- Ingammik qaleralinniarnermi aalisariutit mikisut atorneqarput, immaqalu maannakkut taamaatsillugu ajunngilaq. Kisianni suliffiit allat pilersiortorneqalerneranni aalisariutit annerusut atugaanerulernissaat anguniartariaqarpoq, aalisartut ataasiakkaat isertitaqarneruleqqullugit.

Aalisarneq pillugu ataatsimiititaliarsuup aamma siunnersuutigaa, sinerissamut qanittumi aalisarneq avataasiorlunilu aalisarneq immikkoortinneqarunnaassasut. Chresten Sørensenillu nassuiarpaa, angallatit aalisaataasut assigiinngissutaat aaliangiisuujunnaarpaat, taava taama immikkoortitsineq aqutsinikkut akornusersuutaaginnassasoq.

Taamaammallu siunnersuutigaat, aalisarnerup sinerissap qanittuanut avataasiornermullu immikkoortinneqarnerat atrorunnaarsikkiartuaaarneqassasoq.

- Tassami aamma suli pingaarnerusumik siunnersuutigaarput, nunamut tulaassisussaatitaaneq, sinerissap qanittuani aalisartunut aningaasartuutaaqisoq, atorunnaarsinneqassasoq.

Tamannalu nunami suliffikinnerulernermik kinguneqartussaammat arriitsumik allanngortikkiartuaarneqassasoq siunnersuutigaarput, Aalisarneq pillugu ataatsimiititaliarsuup siulittaasua Chresten Sørensen, Syddansk Universitetimi aningaasarsiornermut professoriusoq, oqarpoq.

Aalisarneq pillugu inatsisissatut siunnersuut Inatsisartuni 2007-imi aappassaaneerneqartinnagu aalisarneq pillugu ataatsimiititaliamut ingerlateqqinneqarpoq. Ataatsimiititaliap inatsisissamik suliaqarnermini aalisarneq pillugu ataatsimiititaliarsuup nalunaarusiaa utaqqivaa, taamaammallu maanna aallarteqqissinnaanngorluni.