Ataatsimiititaliaq piaartumik aggersaqquneqarpoq
Danskit naalagaaffiat marloqiusamik paasissutissiisarsimasoq paasissutissat isertuussat Wikileaksimit saqqummiunneqartut takutippaat.
Danmarkimi nunanut allanut ministeriaqarfimmi atorfilittat USA-p Danmarkimi aallartitaanut James P. Cainimut oqarnerat naapertorlugu timmisartuussisarnerit pillugit paasissutissanik piumasaqarneq qallunaat naalakkersuisuinit anguniarneqarsimanngilaq.
Taamaattumik Folketingimi nunanut allanut tunngassuteqartunut ataatsimiititaliap piaartumik aggersarneqarnissaa Socialdemokraatit, SF-ip Radikalinillu massakkut piumasaraat.
Ministeriunerup Lars Løkke Rasmussenip nunanullu allanut ministerip Lene Espersenip nassuiaateqarnissaat nunanut allanut ministeriusimasup Mogens Lykketoftip, Socialdemokraatineersup, ataatsimiititaliamilu siulittaasumut tulliusup, piumasaraa.
- Folketingimut eqqunngitsunik paasissutissiineq sukannersumik isigineqartariaqarpoq Mogens Lykketoft ritzauimut oqarpoq.
Socialdemokraatit naalakkersuisunngussappata massakkut naalakkersuisuusut USA-mik suleqateqarnerat misissorneqartussanut ilaassasoq, Mogens Lykketoftip ilanngullugu oqaatigaa.
CIA inatsisinik unioqqutitsilluni parnaarussanik angallassisarsimassappat tamanna inuiaqatigiit pisinnaatitaaffiinik unioqqutitsinerussasoq, Holger K. Nielsen SF-imeersoq isumaqarpoq.
Nunanut allanut ministeriusimasoq Per Stig Møller assigiinngitsunik oqariartuuteqartarsimannginnerarpoq, Ministeriunerlu Lars Løkke Rasmussen paasissutissat kingulliit pillugit suli oqaaseqarusunngilaq.