Ataatsimiititaliaq: Naalakkersuisut Sullarinnerullik

- Ilaannut eqqarsarnarpoq, aap, taanna aaqqittariaqarparput. Assersuutigalugu, naak suliassat Naalakkersuisuni aalajangiiffigineqareeraluartut, Aningaasaqarnermut Ataatsimiititaliamut kingusinaartumik apuussimappata. Taamaattut aaqqinneqaannartariaqarput, aningaasaqarnermut naalakkersuisoq Maliina Abelsen oqarpoq.

Ilassutit siorna aningaasaliissutaasimasut Inatsisartuni aappassaaneerlugit ualimut suliarineqarput, Aningaasaqarnermullu Ataatsimiititaliap isumaliutissiissummini maluginiarpaa, ataatsimiititaliaq akulikippallaamik kingusissukkut akuliutsinneqartartoq. Aammalu oqarput, ajornartorsiut taanna ukiut ingerlaneranni milliartorpasinngitsoq, allat killormoortuanut ingerlarpasilluni. Aningaasaqarnermulli ataatsimiititaliap taannaannaq uparuuanngilaa.

- Qinnutigineqartut aningaasanut inatsisissap suliarineqareernerani naatsorsuutigineqarsimasuussanngitsut, tassalu tassanngaannaq takkuttuusimassasut, taamaalillutik immikkut peqqutissaqartumik qinnutigineqassallutik.  Taanna ersersinneqartariaqarpoq Naalakkersuisut qinnuteqaatinik suliarinninneranni, ataatsimiititaliap siulittaasua Olga P. Berthelsen oqarpoq.

Allatut oqaatigalugu, siumungaaq ilisimareersinaanngisat kisiisa pillugit ilassutitut aningaasaliisarnissaq, Naalakkersuisut pikkoriffiginerulertariaqaraat. Ilassutitut aningaasaliissutissat Aningaasaqarnermut ataatsimiititaliap siorna suliarisai 64-iupput, taakkualu affaat ukiup qaammataani sisamani kingullerni takkupput. Taamaammat kingumoortumik aningasaliissuteqartalertoorsinnaaneq ataatsimiititaliap mianersoqqussutigaa.

Taamaaliornissaq missingersuusiornermut inatsimmut naapertuutinngilaq. Aamma kaammattuutigineqarpoq, Naalakkersuisut naatsorsuutinik kusassaanissaq siunertaralugu aningaasaliissutinik ukiup naalernerani nussuisassanngitsoq. Taamalu isornartorisiuineq Maliina Abelsenip tusaatissatut tiguaa.

Aningaasaqarnermut Ataatsimiititaliami siulittaasoq Olga P. Berthelsen oqarpoq, Naalakkersuisunut isorinnittumik ataatsimiititaliap isumaliutisiissuteqarneratigut, nammineq isornartorsiuisinnaasutsiminik uppernaasaanissaq siunertarinagu.

- Naalakkersuisut isorineqartariaqarpata, uanga isorinninnissara tunuarsimaarfiginavianngilara. Suliaq una, uanga massakkut siulittaasuuffigiligara, ataatsimiititaliap siuliata aamma pikkorilluni sulerulullunilu suiliarisimavaa. Tassuunalu nersortariaqarpoq. Uanga uannut takutitsiniutitut isiginerusunngilara, aamma inuit tallimat uannga suliaqarput, allat tallimat aamma siornatigut suleqataanikuupput, Olga P. Berthelsen oqarpoq.

Siorna ilassutitut aningaasaliissutit 36,5 millioni koruuniupput.