Ataatsimiititaliaq: Kalaallit nunaminni ikinnerussuteqaleratarsinnaapput

Kalaallit Nunaat aatsitassarsiornermit isertitat kisiisa toqqammavigalugit ukiut 20-t 30-illu iluanni namminiilivissappat, kalaallit nunaminni ikinnerussuteqaleratarsinnaapput.
januaarip 24-at 2014 10:41

Nalunaarusiami 'Kalaallit Nunaannut iluaqutissat' ullumi saqqummersinneqartumi inerniliussat ilaat taama oqaasertaqarpoq. Nalunaarusiortuuvoq kalaallit danskillu immikkut ilisimalinnik ataatsimiititaliaat, Kalaallit Nunaanni pinngortitameersut pisuussutit inuiaqatigiinnut iluaqutissanngorlugit atorluarneqarnissaannik siunertaqartumik ataatsimiititaliaq, Ilisimatusarfimmit 2013-imi pilersinneqartoq.

Ataatsimoortumik tapiissutit aatsitassarsiornermit isertitat toqqammavigalugit atorunnaarsinneqassappata, suliniutit angisuut arlallit pisariaqartinneqassapput, taakkulu kingunerisaannik sulisartut allamiut tuusinterpassuit Nunatsinnut tikittussaassapput.

- Maanga nunamut suliartortut atorfigissaartuussapput, pitsaasunik akissarsiaqartinneqarlutik immaqalu aamma politikkikkut pissaaneqartuussallutik, ataatsimiititaliami siulittaasoq Minik Rosing oqarpoq.

Nalunaarusiami nassuiaatigineqarpoq namminiilivittoqassappat, tamanna kalaallit kulturiannut, oqaasiinut politikkikkullu aqutsisuunerannut aserorsaataassasoq.

- Imatut inissittoqarsinnaavoq, pisortatigoortumik naalagaaffiugaluarluni, kalaaliusutut ullumikkut misigisimasut kiffaanngissusermik misigisimasaqarnerminnik annaasaqarsinnaallutik, Minik Rosing.

Taamatulli eqqoriaanermi uuliamik nassaartoqaratarsimasinnaanera ilannguneqarsimanngilaq.

- Ukiunili tullerni 20-ni uuliamik tunisassiortoqalersinnaanera ilimanaateqanngilaq, aamma imaariaannaavoq Kalaallit Nunaanni uuliamik nassaartoqanngitsoortoq.

Taamaammat namminiilivinnissap anguniarnissaanut aatsitassat pinnagit periarfissanik allanik eqqarsartoqarnissaa pisariaqarsinnaavoq. Pissutsilli maannakkutut isikkoqartillugit, ulluinnarni inuunermi atukkat ajorseriarujussuartussaassapput, ataatsimiititaliaq taama inerniliivoq.

- Imaanngilaq suna tamarmi ajortuinnaasoq, kiffaanngissusermilli taamatut ittumik pissarsiniarnermi tamatuma aqqutiginiarnissaa ajornakusoortupilussuusinnaavoq, siulittaasoq oqarpoq.

Ilisimatuulli nalunaarusioqataasut 13-it ilaat ataaseq tamatumunnga isumaqataanngilaq, ikinnerussuteqarlunilu oqaaseqaateqarsimalluni.

- Namminiilivinnissamik periarfissaq aammalu kalaallit nammineernissaassuseqarnerat imminnullu isumagisinnaanerat nalunaarusiami ammut isiginiarneqartutullusooq imaluunniit pisariaqanngitsumik akuersaarneqanngitsutut sammineqaqqajaavoq, inatsisilerinermi professori islandimiu, Gudmundur Alfredsson, ikinnerussuteqarluni oqaaseqaatimini taama allappoq.

Nalunaarusiap inerniliussai Nuummi Ilimmarfimmi ataatsimeersuarnermi aqagu nal. 10.00 saqqummiunneqarlutillu oqaluuserineqassapput.