Ataatsimiititaliaq isumakkeerinnittarnissamut naaggaarpoq

Siunnersuut tamanna Inatsisartuni Inatsiseqarnermut Ataatsimiititaliami partiit ilaasortaatitallit tamakkerlutik isumaqatiginngilaat.

Danskit Inatsiseqarnermut ministeriata, Morten Bødskovip siunnersuutigaa, pinerluuteqarsimasut eqqartuussaareersullu inissinneqarnissaminnik utaqqisut 300-t angullugit amerlassuseqaraluartut isumakkeerfigineqartariaqartut.

Taakku isumakkerfigineqarnerisigut ajornartorsiut qaangernavianngikkipput, Inatsiseqarnermut ataatsimiititaliap siulittaasua, Inuit Ataqatigiinneersoq Isak Hammond oqarpoq.

- Pingaartuuvoq pineqaatinneqarsimasut ilisimassammassuk pineqaatinneqarsimanertik naapertorlugu inissiisarfimmiittassagamik, Isak Hammond oqarpoq nagillunilu oqarluni.

- Pineqaatissiinerit naapertuuttut ujatortuartariaqarpagut, taamatullu siunertaqarneq inuiaqatigiit akornanni oqallisaasariaqarpoq.
Isak Hammondip aamma oqaatigaa periutsit ilagisinnaagaat inuiaqatigiinni sullissinissamik pillaasarneq.

- Siornakkuni Inatsisartuni oqallinnitsinni isumaqatigiissutigaarput, sakkukinnerusumik pinerluuteqarsimasut inuaqatigiinni sullissinermikkut pillarneqartarnissartik aningorsinnaagaat, tamannaavorlu ilaatigut aqqutigineqartariaqartoq, eqqartugassaavorli tamanna, Isak Hammond oqarpoq.

Inissinneqarnissaminnik utaqqisut ikilisinneqarnissaannik siunnersuut tassaavoq pinerluttut qaammatini arfinilinni pineqaatissinneqarsimasut isumakkeerfigineqassasut.

Taakkuinnaalluunniit pineqaraluarpata, Inatsiseqarnermut ataatsimiititaliami siulittaasup tulliata, Anda Uldumip Demokraatit sinnerlugit isummernermini tamanna isumaqatiginagu oqaatigaa.

- Uanga tamanna isumaqatiginngilluinnarpara, isumaqarama qallunaat naalagaaffiata akisussaaffitsit qimarratigissanngikkaat, aaqqiissutissanukky ujartuisariaqarput, tassami imaakkami inuit pineqaatinneqarsimasut pillaatisiartik tigusariaqarmassuk, Anda Uldum oqarpoq.

Siumumit ilaasortap, Kristian Jeremiassenip danskit ministeriata siunnersuutaa aamma isumaqatiginngilaa.

- Pinerlussimasoq pineqaatissinneqartariaqarpoq pinerluutaanut naleqquttumik. Danskit naalagaaffiat aningaasaliisariaqarpoq, maani Nunatsinni inissiisarfinnik pilersitsinissamut, tassami taakkuupput inatsiseqarnermut akisussaasuusut, Kristian Jeremiassen taama oqarpoq.

Inatsiseqarnermut Naalakkersuisoq, Anthon Frederiksen radioaviisimut ippassaq oqarpoq, isumakkeerinnittarnissamik siunnersuut isumaqatiginagu, oqaatigalugu inissiisarfinnik amerlannernik pilersitsineq aaqqiissutissatuaasoq.

Isumakkeerinninnissamik siunnersuut 2011-mili Namminersorlutik Oqartussanut tusarniarneqarsimasoq, Inatsiseqarnermut ministerip oqaatigaa. Tamatumalu kingorna Namminersornerullutik Oqartussat siunnersuut sukumiisumik politikkikkut oqallisigineqassasoq oqaatigalugu, tassalu tamanna Inatsiseqarnermut ministerip maanna utaqqisaa.