Ataatsimiititaliaq immikkut aallutalinnik illersuerusuppoq
Olga P. Berthelsen (IA) Inatsisartuni peqqinnissamut ataatsimiititaliami siulittaasuusup alunik tagiartuisartup inatsisitigut illersorneqarnissaanut iliuuseqarusuppoq.
- Alunik tagiartuisartutut ukiuni pingasuni ilinniarsimasup taaguummi illersorneqarnissaanik kissaateqarnera paasisinnaalluarpara. Pineqartorlu pingajussaaneertinnagu ataatsimiititaliami suliarisinnaanngikkutsigu upernaaru inatsisartut ataatsimiinneranni nangitassatut ingerlassinnaavara, Olga P Berthelsen KNR-imut oqarpoq.
Astrid Fleischer-Rex (D) alunik tagiartuisartoq Thrine Gamst-Pedersen aamma paasisinnaalluarpaa, ataatsimiitsitaliamilu eqqartueqqinnissamut piareersimanerarpoq.
Peqqinnissamut Naalakkersuisoq Agathe Fontain isumaqarpoq immikkut aallutallit pinerluttulerinermik inatsimmi pisortat akuersissutaannik peqaratik napparsimasumik passusisut pillugit aaliangersakkami illersugaareersut, Nakorsaaneqarfimmiillu nakkutigineqareersut.
Alunik tagiartuisartoq Thrine Gamst-Pedersen ukiuni sisamani tagiartuisarfiuteqareersoq ataasiarluniluunniit nakkutiliisunik tusagaqarnikuunnginnami, nakkutilliinerannik apeqqusiivoq.