Ataatsimiititaliaq iliuusissanik ujartuivoq
- 2013-imit 2020-mut CO2-mik mingutsitsinerup annikillisinneqarnissaanut Naalakkersuisut aalajangersimasumik suliniuteqarnissamut saqqummiussinissaat qilanaaraarput, ataatsimiititaliaq allappoq.
Aamma 2008-mit 2012-imut Kyotomi isumaqatigiissut aallaavigalugu mingutsitsinerup annikillisarneqarnissaanik iliuusissanik aalajangersimasunik ujartuilluni ataatsimiititaliaq allappoq.
Silap pissusaa pillugu Københavnimi ataatsimeersuarnermit ullumikkut qaammatip aappaata affaata qaangiunneratigut, ataatsimut angusat ataatsimiititaliap uggorai, nunallu CO2-mik mingutsitsiffiunerpaasut annerusumik isumaqatigiinniarusussuseqarnissaat neriuutigineqaraluarluni.
Taamaattorli ataatsimiititaliap Nunatta angusai nuannaarutigai, tassami suliffissuaqarnikkut ineriartortitsisinnaanissamut periarfissinneqaratta, tamatumalu peqatigisaanik Nunarput silap pissusaanut tunngatillugu unammilligassanut peqataammat.