Sofia Geisler, Inatsisartuni Nunanut Allanut Sinnillimaniarnermullu Ataatsimiititaliaani siulittaasuuvoq.Assi: Inuit Ataqatigiit

Ataatsimiititaliaq EU-p allaffissaa pillugu: Nunarput soqutigineqaleraluttuinnarpoq

Issittoq nunarpullu avataaniit soqutigineqarnera ukiuni kingullerni annertusiartuinnarpoq, soqutiginnittut ilagaat EU, maannalu tassa EU Nuummi allaffittaartussanngorpoq.

USA Nuummi sinniisoqarfeqarpoq. Aamma Rusland sinniisoqarfeqarpoq. Maannalu EU aamma nunatsinni ersarinnerulerusuppoq.

EU nunatsinni allaffimmik pilersitsiniartoq, EU-Kommissioni Issittumut periusissiartaaminik pingasunngornermi saqqummiussigami paasissutissiivoq. Tamanna nunatta avataaniit soqutigineqaleraluttuinnarnerata takussutissat ilagaat.

AAMMA ATUARUK EU-Kommissioni Issittumi inissisimalluarneruniarluni Nuummi allaffeqalerusuttoq

Issittoq nunarpullu nunatta avataaniit ukiuni kingullerni soqutigineqaleraluttuinnartoq, EU-p saqqummiussinerata takutippaa.

Inatsisartut Nunanut Allanut Sillimaniarnermullu Ataatsimiititaliaani siulittaasoq, Inuit Ataqatigiinneersoq, Sofia Geisler isumaqarpoq.

- EU-minngaaniit taamatut iliuuseqarneq tupinnartuliaagunanngilaq ukiut kingulliit arlallit annertusiartuinnartumik nunatta avataaninngaaniit nunarput soqutigineqaleraluttuinnarpoq. Taamaattumik tupaallaatissaagunanngilaq EU-minngaaniit taamatut allaffeqarfissaminnik pilersitsinialermata.

Nunarput nunatta avataaniit soqutigineqaleraluttuinnarnera, ataatsimiititaliami siulittaasup tulliata, Doris J. Jensenip aamma oqaatigaa. EU-llu Nuummi allaffittaarnissaanut tikilluaqqullugu.

- Nunaqqatigiikkaani attaveqatigiinneq pitsaanerulertarpoq, soorlu amerikamiut nunatsinni sinniisoqarfeqartut. Qaninnerutilluta suleqatigiilluarnerusarpugut, Doris J. Jensen oqarpoq. 

Ilinniarneq pillugu suleqatigiinneq

EU-kommissionip nunatsinni ilinniarnerup pitsanngorsaavigineqarnissaanut 1,7 milliardit koruuninik sapaatit akunnerata siuliani aningaasanik tunniuppai.

Nunarput EU-mul ilaasortaanngilaq, ukiunili arlalinni nunarput EU-lu ilinniartitaanermut tunngatillugu suleqatigiinnertik ingerlatiinnarpaat.

AAMMA ATUARUK EU giver millioner til uddannelse i Grønland  

Aningaasat tunniunneqartut 2021-imiit 2027-p tungaanut agguataarneqassapput, taakkulu nunatta pisariaqartilluinnarai, ataatsimiititaliaq naqissusiivoq.

- Taamaattumik isumalerujussuupput soorunami. EU-minngaaniit aningaasaliisutit taakkua tassaagamik qallunaat naalagaaffiata ukiumoortumik tapiissutigisartagaasa saniatigut nunatsinnut tutsinneqartartut annerpaat ilaat, Sofia Geisler oqarpoq.

EU-kommissionip Nuummi allaffeqalernermigut EU-p nunatsinnut tapersersuinini Naalakkersuisunullu qanimut suleqateqarnini nukittorsassallugu allappoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat