Ataatsimiititaliaq Danmarkimi Islandimilu paasisassarsiorluni angalavoq
Danmarkimi katsorsaasarfiit pingasut, periaatsinik assigiinngitsunik tunngavillit, assigiinngitsunillu isiginnittaaseqarlutillu atuutsitsisut, ataatsimiititaliap paasisassarsiorfigissavai. Islandimi meeqqat inuusuttuaqqallu kinguaassiuutimikkut atornerlunneqarsimasut illu ornittagaat, Børnehuset takuniarneqassaaq.
Namminersorlutik Oqartussat naapertorlugit inatsisartut ukiakkut ataatsimiinneranni aalajangiiffigisassatut siunnersuutit marluk ataatsimiititaliami suliarineqartut toqqaannartumik malitsigisaannik una suliniutaavoq. Siunnersuutit tunngavigalugit kinguaassiuutimikkut Nunatsinni atornerlunneqarsimasut ikorfartorneqarfissannik katsorsaavimmillu Nunatsinni pilersitsisoqassaaq.
- Kalaallit Nunaanni børnehusimik pilersitsisoqarnissaanut, aamma Aningaasanut Inatsimmi siunertamut aningaasanik immikkoortitsisoqarnissaanut Ilaqutariinnermut Ataatsimiititaliaq tapersersueqatassaappat, tamakku pillugit paasissutissanik aalajangersimasunik ataatsimiititaliaq pissarsisariaqarpoq, Inatsisartut Allattoqarfiat tusagassiuutitigut nalunaarummini taama ilisimatitsivoq.
