Assi: Siumut Folketingimi

Isumasioqatigiinneq: Ataatsimiititaliaq Camp Century pillugu paasissutissanik amerlanerusunik ujartuisoq

USA-p sorsunnerup nillertup nalaani Sermersuup iluani sakkutooqarfigisimasaa, Camp Century, Folketingimi marlunngorpat isumasioqatigiinnermi kingumut oqaluuserineqartussanngorpoq. Tamatumuuna danskit sakkutooqarfimmi kilitsissiaqarsimanerannik DR-ip qulaajaanerata kingorna.

Folketingip Kalaallit Nunaannut tunngasunut ataatsimiititaliaa nunanut allanut ministerip Anders Samuelsenip amerikamiut sakkutooqarfigisimasaat Camp Century pillugu isumasiornissaanut kingumut aggersaavoq. Tamatumuuna Folketingip nunanut allanut tunngasunut ataatsimiititaliaa suleqatigalugu.

Kalaallit Nunaannut tunngasunut ataatsimiititaliap siulittaasua, Nunatta Qitornaaneersoq Aleqa Hammond ilaatigut apeqquteqassaaq. Taassuma piumasaraa Camp Centuryp 1958-imi USA-mit pilersinneqarneranut isumaqatigiissutitigut toqqammavigineqartoq danskit naalakkersuisuinit nassuiaateqarfigineqassasoq.

AAMMA ATUARUK Aleqap Camp Century pillugu isumasioqatigiinnissamut Samuelsen aggersaraa

USA-p sakkutooqarfimmi atomimik nukissiorfimmik piigaqarsimaneranut suna pissutaarpiarsimanersoq Hammondip paaserusuppaa. Tamanna pillugu paasissutissat suli nalunartoqartikkamigit.

Marlunngornermi isumasioqatigiinneq marsip qaammataani pisussaagaluarpoq, Inatsisartunullu qinersinissap apriilimi suaarutigineqarnerata kingorna kinguartinneqarluni.

Paasisaq: Danskit Camp Centurymi kilitsissiaqartut

Piffissamili tassani DR-ip radiukkut piviusulersaarusiamini "Manden uden Skygge"-mi danskip Erik Jørgen-Jensenip 1960-imit 1963-imut amerikamiut sakkutooqarfianit Illersornissamut qullersaqarfiup isertortumik paasiniaasartuinut Københavnimiittunut Camp Centurymi pissutsit pillugit nalunaaruteqartarsimanera qulaajaaffigaa, tamatumunnga ilaallutik atomimik nukissiorfik taassumalu atuuffia.

AAMMA ATUARUK Danmark Camp Centurymi kilitsissiaqarsimasoq

Camp Centurymi kilitsitsiaqartitsisoqarsimanera ilumoornersoq ilumuunnginnersorluunniit illersornissamut qullersaqarfiup isertortumik paasiniaasartuisa oqaatigiumanngilaat.

Enhedslistenilli Kalaallit Nunaannut tunngasunut oqaaseqartartuata Christian Juhlip piumasaraa Camp Centurymi danskit kilitsissiaqarsimanerat Nunanut allanut ministereqarfimmit Københavnimiittumit ilisimaneqarsimanersoq akissuteqarfigineqassasoq.

Nunanut allanut ministereqarfik Isumasioqatigiinnissaq sioqqullugu allagaaterpassuarnik ataatsimiititalianut nassiussisimavoq, taakkununnga ilaallutik amerikamiut nunatsiniinnerat pillugu USA-mut ukiut ingerlanerani isumaqatigiissutaasarsimasut.

Isumasioqatigiinneq Folketingip nittartagaatigut toqqaannartumik isiginnaarneqarsinnaavoq, Kitaanilu nalunaaqutaq malillugu nal. 7.30 aallartissalluni.

AAMMA ATUARUK Saliinissaq pillugu isumaqatigiissuteqarnera allagaatitoqqami paasineqartoq

AAMMA ATUARUK Danmarkip USA saliinissamut tunngatillugu saaffigisimanngilaa

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat