Ataatsimiititaliap apeqquteqaataanik Naalakkersuisut akiniarnerisa piffissatorfiunera pissutigalugu ataatsimiititaliap Naalakkersuisut aappassaaneerinninnissamut allannguutissatut siunnersuutigisaasa ilaasa aalajangiiffiginissaat kinguartippaat.Assi: KNR

Ataatsimiititaliaq: Amigartoorutit matussusernissaannut piffissakippoq

Politikerit 2020-mut aningaasanut inatsisissap pingajussaaneerneqarnissaanut ulapissapput. Missingersuutinimi maannakkut amigartooruteqarpoq, tamannalu inatsisip atuutilersinneqannginnerani matussuserneqassaaq. Tamatumalu iluatsinnissaa aningaasanullu inatsisip taperserluarneqarnissaa Naalakkersuisut neriuutigaat.

Aningaasanut inatsisissatut siunnersuut marlunngornermi aappassaaneerneqassasoq pilersaarutaavoq. Immikkoortoq siusinnerusukkut aappassaaneerneqassasoq pilersaarutaagaluarpoq, tamannali Aningaasaqarnermut Akileraartarnermullu Ataatsimiititaliap kissaateqarneratigut kinguartinneqarpoq.

Ataatsimiititaliaq taamaalilluni pingajussaaneerinninnissam tungaanut piffissakinnerulerpoq. Suliassaqangaatsiaraluarporli, amigartoorutimmi 70 millionit koruuniusut matussuserneqarnissaanut aningaasanik nassaarniartoqartussaavoq.

Naalakkersuisut ataatsimiititaliap ulluliussaanit ullunik 18-inik kingusinaarlutik akissuteqarsimasut Aningaasaqarnermut Akileraartarnermullu Ataatsimiititaliaq allappoq, tamannalu pissutigalugu ataatsimiititaliap aningaasanut inatsisip aappassaaneerneqarnissaata novembarip tallimaanut kinguartinneqarnissaa piumasaraa.

Kinguartitsinerli peqqutigalugu aappassaaneerinninnerup pingajussaaneerinnissallu akornanni piffissaq sivikinnerulerpoq.

- Tamanna ataatsimiititaliamit assut ajuusaarnartinneqarpoq, ataatsimiititaliaq allappoq.

Suliassarpassuaqartoq ataatsimiititaliaq allappoq. Aningaasanut inatsisip aappassaaneerneqarnissaanut ukiunut sisamanut 70,6 millionit koruuninik amigartooruteqarpoq.

AAMMA ATUARUK 12 studerende fik en lang næse: Deres nye uddannelser er aflyst

Ilaatigut Niuernermut Ilinniarfimmi bacheloritut ilinniarfinnut marlunnut, ilinnialerfissap aallartilernerani ukioq manna taamaatinneqartunut Peqqissaanermik Ilinniarfimmilu ilinniartoqatigiiaamut ukiuni sisamani katillugit 33 millionit koruunit sinnilaarlugit atorneqarnissaat siunnersuutigineqarpoq. Aamma innarluutilinnut Ilulissani ulloq unnuarlu angerlarsimaffimmut Sungiusarfik Ikinngummi illutap nutaap naammassineqarnissaanut 2020-mi 2021-milu 20 millionit koruunit sinnilaarlugit atorneqarnissaat siunnersuutigineqarpoq.

Siunnersuutip pingajussaaneerneqarnissaanut Naalakkersuisut allannguutissatut siunnersuuteqassapput, taamaalilluni aningaasanut inatsit missingersuutinut inatsimmut naleqqunnerulissalluni. Aningaasanut inatsisip ukiuni sisamani atuuffiani naligiissaartoqassasoq, missingersuutinut inatsimmi allassimavoq.

Aappassaaneerinninnissalli kinguartinneqarneratigut amigartooruteqarnermik matussusiinissamut allannguutissatut siunnersuuteqarnissamut ullut qulingiluaannaat periarfissaalerput.

- Tamatumunnga taperseeqataanissani ataatsimiititaliap qilanaaraa, takusinnaalluguli siunnersuutip pingajussaaneerneqarnissaanut Naalakkersuisut allannguutissatut siunnersuutaasa misissornissaannut naammattumik piffissaqarnissaq ajornakusoorsinnaasoq. Ajornartorsiut tamanna immikkut eqqumaffiginiaqqullugu Naalakkersuisut ataatsimiititaliamit kaammattorneqarput, ataatsimiititaliaq isumaliutissiissummini allappoq.

Ataatsimiititaliap apeqquteqaataanik Naalakkersuisut akiniarnerisa piffissatorfiunera pissutigalugu ataatsimiititaliap Naalakkersuisut aappassaaneerinninnissamut allannguutissatut siunnersuutigisaasa ilaasa aalajangiiffiginissaat kinguartippaat.

AAMMA ATUARUK Ataatsimiititaliap sulinermut ilanngaat kinguartinniaraa

Naak aningaasanut inatsimmik sulineq ilungersornartaluartoq, 2020-imut aningaasanut inatsisissatut siunnersuut pingajussaanerneqartinnagu aningaasanut inatsit pillugu isumaqatigiissummik naalakkersuisut saqqummiussisinnaassasut, naalakkersuisup Vittus Qujaukitsup naatsorsuutigaa,

- 2020-mut aningaasanut inatsit amerlanerussuteqarluartumik taperserneqarlunilu tunuliaqutserneqassasoq Naalakkersuisut neriuutigaat, Qujaukitsoq oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat