Ataatsimiititaliap suliassaa aaqqitaareersimanersoq borgmesterinit aarleqqutigineqarpoq
Hermann Berthelsen, Jess Svane aamma Simon Simonsen isumaqarput, ataatsimiititaliap ilaasortaasa affaasa Danmarkimi, affaasalu Nuummi najugaqarnerat eqqumiitsoq.
- Danmarkimiit Nuummut attaveqarneq pingaarnerusutut inissitaasoq pasinarpoq, Qaasuitsup Kommuniani borgmesteri Jess Svane, oqarpoq.
Borgmesterit oqarnerat naapertorlugu, imarpik umiarsuarmik ikaarlugu Nuummi talittarfeqalernissaa, imarpillu qulaallugu mittarfeqarneqalernissaa, Angallanneq pillugu ataatsimiititaliami ilaasortat marluk soqutigisorujussuuvaat. Ilaasortaq alla Namminersornerullutik Oqartussat Nuup Kommuniatalu nalaanni Nuup illoqarfiani attaveqaatitigut sanaartukkani siunnersortaasimavoq, Ilulissani Nuummilu umiarsualiviit mittarfiillu allineqarnissaat suleqatigiissitap taamani sulissutigaa.
Siunnersortip 2007-imi inerniliineranit Angalllanneq pillugu ataatsimiititaliap allaanerusumik inerniliinissaa, Qeqqata Kommuniani borgmesterip Hermann Berthelsenip, aamma Kommune Kujallermi borgmesterip Simon Simonsenip, qularutigaat.
Borgmesterit pingasut pineqartut partii Siumut sinnerlugu qinigaapput. Kommuneqarfik Sermersuumi borgmesteri, Asii Chemnitz Narup, Inuit Ataqatigiit sinnerlugit qinigaasoq, tusagassiuutinut nalunaarummi peqataanngilaq.
