Ataatsimiititaliap Jens B. nukingisaarpaa

Imaani annaassiniarnissamut upalungaarsimaneq SAR-imik naalisarneqartartup nutaamik isumaqatigiinniutigineqarnissaa tusagassiutini sammineqarlualeriarmat Inatsisartut Sanaartugassanut- Avatangiisinullu tunngasunut ataatsimiititaliaa soqutiginnileriataarpoq.
novembarip 05-at 2012 09:45

Imaanimi annaassiniarnissamut upalungaarsimanissamut Danmarkip naalagaaffiata Namminersorlutillu Oqartussat akornanni isumaqatigiissut ukiup matuma naanerani atorunnaassaaq. Asulu isumaqatigiissutitoqqamisut Kalaallit Nunaata akileeqataasarnera atorunnaarsinneqassasoq Naalakkersuisutta qallunaat naalakkersuisuinut nalunaarutigisimagaat.

Imaanimi annaassiniarnissamut upalungaarsimaneq qallunaat akisussaaffigigaat Naalakkersuisup Jens B. Frederiksenip Radioaviisimut naqissusereerpaa.

Upalungaarsimanermut siornatigut aningaasaliussat 12 millionit koruuniupput, taakkulu sisamararterutaat, tassa 3 millionit koruunit nunatta karsianit siornatigut ukiut tamaasa akileeqataaffigineqartaraluarput.

Upalungaarsimanerlu tusagassiutitigut sammineqarluareersorlu Inatsisartut Sanaartornermut- Avatagiisunullu tunngasunut ataatsimiititaliaat maanna akuleruteriataarpoq, SAR-imillu upalungaarsimanerup suliarineqarnerata ingerlarnga ataatsimiititaliami malinnaavigilluarneqarnera tusagassiutinut nalunaarutigineqarluni.

Ataatsimiititaliammi Naalakkersuisoq Jens B. Frederiksen isumasiorniarlugu qaaqqusimanerarpaat, Nunattalu SAR-imut upalungaarsimanermut isumaqatigiissutitoqaq atorunnaarsinneqarpat nunatta aningaasaqarniarneranut qanoq sunniuteqassanersoq paasiniarneqassalluni. Nunattami upalungaarsimanermut akileeqataasarunnaarniarnera Folketingimi ministerit apeqqarissaarfigineqarnerinili qangali tusarliunneqareerpoq. Tassa nunatta karsia ukiumut 3 millionit koruuninik sipaaruteqartalissaaq.

Aamma Folketingip Kalaallit Nunaat pillugu ataatsimiititaliaat illersornissamullu tunngasunut ataatsimiititaliaat SAR-imut tunngasunik sammisaqarluareersimaqisut Inatsisartut Sanaartornermut Avatagiisinullu tunngasunut ataatsimiititaliaata attaveqarfiginiarpaat, aasarlu manna Folketingimi ilaasortat nunatsinnut tikeraarmata SAR-imut tunngasut oqaluuserineqarluartareersimallutik.