Naalakkersuisut sakkutuujusussaatitaanermik ilinniarneq nunatsinni suliffeqarnermut pilersuutaasinnaasussatut ilinniarfittut isigineqarsinnaanngissoraat.Assi: KNR

Ataatsimiititaliap illersornissaqarfimmi ilinnialernissamut misilitsittarnerit pillugit nassuiaateqartoqaqqugaa

Naalakkersuisut, Pele Broberg Peter Olsenilu inuusuttunut Illersornissaqarfimmi ilinnialernissamut misilitsittarnerit pillugit nassuiaateqartariaqartut, Inatsisartut Nunanut Allanut Sillimaniarnermullu Ataatsimiititaliaa isumaqarpoq.

Illersornissaqarfiup nunatsinni misilitsitsisarnerata unitsikkallarneqarnissaa nunanut allanut tunngasunut Naalakkersuisup, Pele Brobergip piumasaraa.

Tamanna pissutigalugu inuusuttut Illersornissaqarfimmi ilinnialernissamut misilitsikkusuttut Danmarkimut angalaqqaartariaqalerput.

Uanilu paatsuunganartoqalerpoq.

Inuusuttut ilinniarnermusiat aqqutigalugit sakkutuujusussaatitaanermik misilitsinniarunik inuusuttutulli allatulli Danmarkimut ilinniarialersutut angalanissaminnut akiliunneqarsinnaappat?

AAMMA ATUARUK Naalakkersuisut sakkutuujusussaatitaanermut misilitsittarnerit unitsikkaat

Naamik, akiliunneqarsinnaanngillat.

Ilinniartitaanermut naalakkersuisup, Peter Olsenip (IA) oqarnera naapertorlugu inuusuttut ilinniartuunersiuteqarnissamut inatsit aqqutigalugu ilinnialernissaminnut Danmarkimut misilitsikkiartornissamut akiliunneqarsinnaanngillat.

Naalakkersuisut sakkutuujusussaatitaanermik ilinniarneq nunatsinni suliffeqarnermut pilersuutaasinnaasussatut ilinniarfittut isigineqarsinnaanngissoraat.

Ataatsimiititaliap Naalakkersuisut sakkutuujusussaatitaanermik misilitsinnerit pillugit ataatsimeeqatigigaa

Taamaammat Inatsisartut Nunanut allanut Sillimaniarnermullu ataatsimiititaliaa erseqqissaatitsiniarpoq.

Ataatsimiititaliap Naalakkersuisut taakku marluullutik maanna qanoq periarfissaqarneranik tamanut nassuiaateqarnissaat piumasaraa.

AAMMA ATUARUK Julie Broberg Aasianni illersornissaqarfimmut misilitsippoq

- Tamanna tunngavigalugu Ataatsimiititaliap Naalakkersuisut pineqartut marluk kaammattorpai tamanit atuarneqarsinnaasumik inuusuttunut nassuiaasseqqullugit Illersornissaqarfimmi ilinniarnissaminnut periarfissaat suunersut.

- Inuusuttut taakku ilinniartuunersiuteqarnermut inatsimmi periarfissaat suunersut, tamatumunngalu ilanngullugu sakkutuujusussaatitaanermut atatillugu misilitsinneq qanoq kalluarneqarnersoq Naalakkersuisut tungaanniit inuusuttunut tamanna tunniunneqartariaqartoq Ataatsimiititaliaq isumaqarpoq.

Nunanut Allanut Sillimaniarnermullu Ataatsimiititaliap siulittaasua, Sofia Geisler (IA) tusagassiuutinut nalunaarummi allappoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat