Ataatsimiititaliap CIA pillugu misissuinissaq aalajangiusimavaa
Tusagassiuutitigut nalunaarut naapertorlugu, Kalaallit Nunaata silaannartaata, aamma mittarfiit tigusanik isertortumik timmisartuussilluni, inuit pisinnaatitaaffiinik kanngunarsaasumik atorneqartarsimaneranut apeqqutit, ataatsimiititaliap ilungersunartutut isigai. Kalaallit Nunaanni naalakkersuinermi Inatsisartutigut arlaannaannulluunniit attuumassuteqanngitsunut misissuititsinissap piumasarineqartup Danmarkimi naalakkersuisunit ataqqineqarnissaa ataatsimiititaliamit neriuutigineqarpoq.
Kuupik Kleistimut apeqqarissaarnerminni Naalakkersuisut Danmarkimi naalakkersuisunut saaffiginnissimanersut, apeqqullu pillugu Naalakkersuisut qanoq iliulersaarnerat ,Nunanut allanut Sillimaniarnermullu Ataatsimiititaliap paaserusussimavaa.
IA-p Folketingimut ilaasortaatitaata, Sara Olsvigip CIA-p Nunatta silaannartaani tigusanik timmisartuussisarsimaneragaanerata misissorneqarnissaanut Danmarkimi naalakkersuisut qanoq isumaqarnersut pillugit, nunanut allanut tunngasunut ministerip akissuteqarnissaa maanna piumasarilerpaa. Tamanna allakkatigut akisassanngorlugu Nunanullu allanut tunngasutnut Ataatsimiititaliami oqallisigisassanngorlugu apeqqutigineqarpoq.
Sara Olsvig ataasinngormat Enhedslistenimik suliaq pillugu isumasioqateqarpoq. Enhedslisten tassaavoq Folketingimi partiini kisiartaalluni misissuititsinissamik piumasaqarnerminik attassisoq. Frank Aaen, Enhedslistenimeersoq nunanut allanut tunngasunut ministerimut arlalinnik aqagu apeqquteqarniarpoq.
