Ataatsimiititaliap angalanera iluatsilluartoq

- Politikkertoqaannarani aammali suliffeqarfippassuit illoqarfinni nunaqarfinnilu Qaqortup, Narsap Nanortallillu kommuuniiniittut alakkarterpavut. Aamma Upernaviarsummi misileraavik pulaarneqarpoq, taama ataatsimiititaliami siulittaasoq Lars-Emil Johansen, Siumut, oqarpoq imalu nangilluni.

- Inuussutissarsiornikkut periarfissat allat nutaat aamma paasisassarsiorfigaavut. Narsami kommunalbestyrelsep ataatsimeeqatigineqarani aatsitassarsiornikkut Narsami eqqaanilu periarfissat taakkartorneqarput. Suut mianersorfissaanersut allallu, Lars-Emil Johansen oqarpoq.

Atuarfiit ilinniarfiillu aamma pulaarneqarput.

-Qaqortumi borgmesteri kommunip ineriartorneranik nassuiaavoq. Aamma kuultisiorfimmi Nalunami qaqqap iluanut kilometererpassuit sulluliorfiusinnaasumi angalaarpugut. Ataatsimut isigalugu oqaluttuarisaanikkut inuussutissarsiornikkut, silap pissusaata allanngoriartornera aammalu kommunit kattussuunneranut tunngasut tusarpagut.

Folketingip Kalaallit Nunaannut tunngasuni ataatsimiititaliaa angalanerminnik naammagisimaarinnippoq.

- Namminersorneq pillugu aamma paasisaqarpugut. Uanga immaqa allaanerusumik tunulequtaqarlunga angalaaqataavunga, kisianni maluginiarpara angaasoqartoq aamma akerliusoqarpoq. Ataatsimulli isigalugu nammineerusunneq siornatigumut naleqqiullugu anginerulersimasoq, danskit folketingimi ilaasortat maluginiarpaat. Oqarput maannakkut Kalaallit Nunaat namminersulernissamut piareersimarpasissoq, ilama uannut apuussaat issuaannarpakka, ataatsimiititaliami siulittaasoq Lars-Emil Johansen naggasiivoq.

Folketingimi ilaasortat ullumi angerlamut aallararput.