Ataatsimiititalianut toqqaapput

Ataatsimiititalianut siunnersuisoqatigiinnullu ilaasortassanik toqqaaneq Inatsisartut ippassaq naggataarutaasumik ataatsimiinnerminni aamma oqaluuseraat. Paasinarsivorlu Inuit Ataqatigiit Siumullu isummaminnik allanngortitseqqissimasut, Atassummillu teknikkikkut suleqateqarnertik nangeqqiinnaraat. Suleqatigiinneq tamanna kukkunersiuisut nalunaarutaat pillugu marlunngormat oqallinnermi taamaatinneqaraluarpoq.

Atassutip suleqatigiunnaarneratigut Inuit Ataqatigiit Siumullu nunat avannarliit siunnersuisoqatigiivinut aallartitartik annaasinnaanissaa ernumagalugu suleqatigiileqqissimasinnaanermut oqalunneq ilumoortortaqanngitsoq, IA-p gruppeformandiata Aqqaluk Lyngep erseqqissaatigaa.

- Tassunga tunngassuteqanngilluinnarpoq, isumaqarpugulli suleqatigiikkunnaarnissamut maanna piffissaanngitsoq. Aqqaluk Lynge oqarpoq.

Erseqqissaatigaali, Inatsisartut tulliani ataatsimiititalianut toqqaalerpata Atassut nutaamik teknikkikkut suleqatissarsiortariaqassasoq.